Xəbər verildiyi kimi, Rusiyanın İjevsk şəhərində yerləşən 88 saylı məktəbdə atışma olub. Hadisə nəticəsində 13 nəfər ölüb. Onlardan 7-si məktəblidir. Bundan əlavə, 14-ü uşaq olmaqla 21 nəfər yaralanıb. Məktəbdəki atışmanı həmin təhsil ocağının məzunu, 1988-ci il təvəllüdlü Artyom Kazantsev törədib. O, silahla məktəbə daxil olaraq, qarşısına çıxan şəxslərə atəş açıb.
Rusiya İstintaq Komitəsinin müstəntiqləri hadisəni törədən şəxsin İjevsk şəhərinin sakini olduğunu bildirib. O, əsəb-psixiatriya mərkəzində qeydiyyatda olub.
Rusiya prezidenti Vladimir Putinin sözçüsü Dmitri Peskov bildirib ki, Kreml İjevskdəki məktəbə silahlı hücumu terror aktı kimi qiymətləndirib.
Onun sözlərinə görə, hücumu, ehtimal ki, neofaşist təşkilat və ya qrupuna mənsub olan şəxs həyata keçirib. O, dövlət başçısı V.Putinin hadisədən kədərləndiyini söyləyib: “Baş verənlər qeyri-insani hadisə, terrordur”. D.Peskov vurğulayıb ki, Rusiya Fövqəladə Hallar Nazirliyinin həkimləri və psixoloqları olan təyyarə İjevskə göndərilib.
Rusiyanın belə çətin vaxtında neofaşistlər niyə gedib Ukraynada vuruşmaq əvəzinə Rusiyada uşaqları öldürür? Bu nə dərəcədə inandırıcı sayıla bilər?
Təhlükəsizlik qurumlarının sabiq əməkdaşı, Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki,
bənzər hadisə keçən il Rusiyanın Kazan şəhərində də baş vermişdi. O vaxt hadisə nəticəsində yeddi uşaq və bir müəllimə həlak olmuşdu: “Udmurtiyanın İjevsk şəhərində yaşanmış hadisə, əlbəttə ki, faciəvi hadisədir. Bu hadisə zamanı on yeddi nəfər – altısı böyük, on bir nəfəri isə kiçik yaşlarında olmaqla həyatını itirib. Hadisəni törədərək sonradan intihar etmiş şəxsin elə həmin məktəbin məzunu, 1988-ci il təvəllüdlü, 34 yaşlı Artyom Kazantsev olduğu müəyyən edilib.
Verilən məlumatda onun əynində üstündə svastika həkk edilmiş qara mayka olub ki, bu da onun neofaşist qruplardan birinin üzvü olmasına dəlalət edir.
İstifadə edilmiş silah haqqında veilmiş məlumatdan göründüyü kimi, hadisə, yəni terror aktı əvvəlldən planlaşdırılmış şəkildə həyata keçirilib. Belə ki, hadisə yerində atəş açmağa yararlı hala gətirilmiş və seriya nömrələri sonradan silinmiş iki ədəd tapança aşkar edilib.
Bənzər hadisə elə bu ilin aprel ayında Rusiya Federasiyasının Ulyanovsk əyalətində də baş vermişdi. Bu halda terrorçu uşaq bağçasına daxil olaraq iki körpəni və dayəni qətlə yetirdikdən sonra intihar etmişdi.
Hər iki halda terrorçuların nevroloji dispanserdə qeydiyyatda olduqları göstərilir. Amma buna baxmayaraq, hadisənin məhz Rusiya əyalətlərində - özü də milli əyalətlərdə baş verməsi digər amillərin də, məsələn, millətçilikdən doğan amillərin də yer almasını düşünməyə əsas verir.
Hər halda, neofaşist təmayüllü birisinin addımını təkcə nevroloji xəstəliyə meylli adamın hərəkətləri olaraq dəyərləndirmək, hadisəni birtərəfli araşdırmaq və onu müəyyən bir istiqamətdə təqdim etmək məncə doğru deyil. Faşist ideologiyasına xidmət edən birisinin digər millətlərə nifrəti də hadisənin törədilmə səbəblərindən biri ola bilər. Hər halda, Udmurt və digər türkdilli millətlərin kompakt şəkildə yaşadıqları milli ərazilərdə baş verən bu qanlı hadisə həm də belə qənaətə gəlməyə rəvac verir”.
Məhəmmədəli QƏRİBLİ
