Məlum olduğu kimi, Rusiya prezidenti Vladimir Putin 21 sentyabr tarixində ölkə ərazisində qismən səfərbərlik elan edib. Rusiya prezidentinin bu addımı ölkədə birmənalı qarşılanmır və səfərbərlik əleyhinə mitinqlər keçirilir, insanlar övladlarının, qardaşlarının müharibəyə getməsini istəmir, gənclərin xeyli bir hissəsi də əsasən müharibəyə getməkdən yayınır, fərari olmağa üstünlük verirlər.
Qeyd edək ki, Rusiya Dövlət Duması Cinayət Məcəlləsinə “səfərbərlik”, “hərbi vəziyyət”, “müharibə vaxtı” və “silahlı münaqişə” anlayışlarının daxil edilməsi, habelə bu dövrlərlə bağlı cinayətlərə görə məsuliyyətin sərtləşdirilməsini nəzərdə tutan dəyişikliklərin olduğu qanun layihəsini ikinci və üçüncü oxunuşda təsdiqləyib.
Qanunvericiliyə edilən dəyişikliklərin təşəbbüsü Dövlət Dumasının bütün fraksiyalarının deputatları, həmçinin senatorlar Andrey Klişas və Olqa Kovitidi hazırlayıb.
Bu arada Almaniya səfərbərlikdən yayınan rusiyalı fərariləri qəbul etməyə hazır olduğunu bəyan edib. Bu barədə “Frankfurter Allgemeine Zeitung” qəzetinə müsahibəsində Almaniyanın daxili işlər naziri Nensi Fizer deyib. O, Rusiyada qismən səfərbərliyin elan edilməsindən sonra döyüşməkdən imtina edən çağırışçıların repressiyaya məruz qalmamaları üçün Almaniyada sığınacaq tapa biləcəklərini qeyd edib: “Ciddi repressiya ilə təhdid edilən fərarilər bir qayda olaraq Almaniyada beynəlxalq müdafiə ala bilərlər.
“Buna bir növ Qərblə Rusiya arasında siyasi-ideoloji mübarizənin bir elementi kimi də yanaşıram”
Məsələyə şərh verən siyasi elmlər üzrə fəlsəfə doktoru Mətin Məmmədli “Bakı Xəbər”ə bildirdi ki, əvvəla, hazırda Ukraynada Qərblə Rusiya arasında. belə demək mümkünsə, vəkalət savaşı gedir. “Burada Qərbin əsas məqsədlərindən biri Rusiyanı təkcə hərbi baxımdan deyil, həm də siyasi-iqtisadi və sosial zəmində zəiflətməkdən ibarətdir. Qərbin məqsədlərinə bu da daxildir. Əlbəttə, Almaniyanın daxili işlər nazirinin də bu açıqlamanı verməkdə əsas məqsədi ondan ibarətdir ki, Rusiya daxilində ölkə hakimiyyətindən narazılığı daha da artırsın, ölkədən insanların axınını daha da gücləndirsin. Bildiyiniz kimi, Rusiyada qismən səfərbərlik elan olunduqdan sonra insanlar, xüsusən də gənc nəsil Rusiyanı tərk etməyə çalışır. Bununla bağlı mediada da geniş xəbərlər tirajlanır. Təbii ki, bunu Qərbdə də izləyirlər və çalışırlar ki, ilk növbədə insanların Rusiyanı tərk etməsini stimullaşdırsınlar. Yəni buna bir növ Qərblə Rusiya arasında siyasi-ideoloji mübarizənin bir elementi kimi də yanaşıram"
Rusiya vətəndaşlarının döyüşdən imtina etməsinin səbəblərinə gəlincə, M.Məmmədli qeyd etdi ki, səbəb aydındır. M.Məmmədlinin sözlərinə görə, insanlar Ukraynada gedən müharibəni öz Vətən müharibələri hesab etmirlər və ona mənasız bir müharibə kimi yanaşırlar. "Buna daha çox ölkə hakimiyyətinin özünün geosiyasi ambisiyalarından doğan münaqişə kimi yanaşırlar. Belə demək mümkünsə, onların Ukraynada döyüşmək üçün elə bir motivasiyası yoxdur. Əksinə, ukraynalılar Vətən müharibəsi apardıqlarına, yəni ölkələrini işğaldan, istiladan qorumağa çalışdıqlarına görə motivasiyaları yüksək səviyyədədir. Amma ruslarda bunu görə bilmirik”-deyə M.Məmmədli qeyd etdi.
İradə SARIYEVA
