Rusiya Prezidenti Vladimir Putin bəyan edib ki, ölkəsi “Luqansk Xalq Respublikası”, “Donetsk Xalq Respublikası”nda, Xerson və Zaporojye vilayətlərində referendumun keçirilməsinə hər cür dəstək verəcək: “Referendumun təhlükəsiz şəraitdə keçirilməsi, insanların bölgənin gələcəyi ilə bağlı iradələrini sərbəst ifadə edə bilmələri üçün hər şey edəcəyik”.
Rusiya lideri əlavə edib ki, bölgə əhalisinin çoxluğunun referendumda qəbul edəcəyi qərarı dəstəkləyəcəklər.
Qeyd edək ki, “Luqansk Xalq Respublikası”, “Donetsk Xalq Respublikası”, Xerson və Zaporojye vilayətlərində Rusiyaya birləşməyə dair sentyabrın 23-27-dək referendum keçiriləcək.
Qondarma respublikalar Rusiyaya biləşdirilərsə nə baş verəcək?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, müharibənin nə zaman dayanacağı ilə bağlı fərziyyələr çoxdur: “Sadəcə, onların heç biri qarşıdan gələn reallığı əks etdirmir. Çünki bu prosesin ətrafında hər gün son dərəcə gərginlik artır. Bunun da səbəbi ondan ibarətdi ki, bu artıq sırf Rusiya-Ukrayna böhranı deyil. Bu, Qərb-Şərq böhranıdır. Tərəflər çalışır ki, bir-birinin mövqelərini zəiflətsinlər. Mən inanmıram ki, referendumların keçirilməsi nəyisə dəyişə biləcək. Müharibənin bitməsi lazımdır. Sadəcə, bu prosesdə həm Moskva, həm də Kiyev sona qədər getmək istəklərini ifadə edir. Bir halda ki, bu referendum keçiriləcək və Rusiya o əraziləri özünə birləşdirəcəksə, deməli, bu süjet xəttinə daha bir kulminasiya nöqtəsi əlavə olunur. Krımın müqəddəratı hələ öz həllini tapmayıb. Digər qondarma respublikaların da məsələsi qaynar gündəmdədir. Hazırda Rusiyanın daxilində vəziyyət gərgindir. Milli azlıqlar etiraza qalxıb, elan olunmuş qismən səfərbərliyə etiraz edirlər. Rusiya bu məsələdə qeyri-adi gedişlərdən istifadə edə bilər. Söhbət nüvə başlıqlarından istifadədən gedir. Əsəblər tarıma çəkiləndə hər şey ola bilər. Bu baş verərsə bütün dünya çapında kataklizm yaşanar. Çünki dünyada münaqişə ocağı yalnız Ukrayna deyil. Başqa bölgələr də var. Rusiya səlis, diplomatik gediş etməlidir ki, atəş dayandırılsın. Hazırda Rusiyanı bir çox tanınmışlar tərk edir. Müharibə edən ölkədə belə hallar ruh düşkünlüyünə səbəb olur. Ukrayna bu proseslərdə daha çox qazanacaq, Qərbdən tələb edəcək ki, ona dəstək verilsin. Çox maraqlıdır ki, ən nüfuzlu beynəlxalq təşkilatın rəhbəri Quterreş bu məsələdə passiv fəaliyyət göstərir. Çalışmaq lazımdır ki, ilk növbədə müharibə dayansın. Referendum sonrakı məsələdir”.
Rusiya Təhlükəsizlik Şurasının sədr müavini, ölkənin sabiq Prezidenti Dmitri Medvedev teleqramda yazıb ki, referendumların keçirilməsi Rusiyanın inkişaf vektorunu tamamilə dəyişəcək: “Rusiya Federasiyasına yeni ərazilərin daxil olmasından sonra dünyada geosiyasi transformasiya dönməz xarakter alacaq. Rusiya ərazisinə müdaxilə bütün özünümüdafiə qüvvələrindən istifadə etməyə imkan verəcək. Konstitusiyaya edilən dəyişikliklərdən sonra Rusiyanın heç bir gələcək lideri hər şeyi geri qaytara bilməyəcək”.
D.Medvedevin qənaətinə görə, Kiyev və Qərb referendumlardan qorxur: “Məhz buna görə də onları keçirmək vacibdir”.
Məhəmmədəli QƏRİBLİ
