Vəziyyət o yerə gəlib çatıb ki, Rusiya Müdafiə nazirliyinin Ukrayna müharibəsi ilə bağlı yaydığı informasiyaların həqiqiliyinə rus mediası da şübhə ilə yanaşır. Sözügedən məsələ Rusiya mediasında müzakirə olunur. Əhali arasında aparılan sorğu zamanı bəlli olub ki, Rusiya Müdafiə Nazirliyinin verdiyi məlumatlar əksər hallarda həqiqəti əks etdirmir və dezinformasiya xarakterlidir.
Sözügedən məsələ ilə bağlı keçirilən son sorğuda iştirak edənlərin yalnız 23 faizi Rusiya MN-nin Ukraynada baş verənlərlə bağlı hesabatlarına tam etibar edir. Sorğu iştirakçılarının 42 faizi hesab edir ki, Müdafiə Nazirliyinin nümayəndəsi İqor Konaşenkovun “yüksək dəqiqlikli hesabatları” çox vaxt real mənzərəni tam əks etdirmi. Sorğu iştirakçılarının 13 faizi üçün bu müntəzəm hesabatlar “yalnız zəhlətökəndir”. Yerdə qalan 22 faiz isə bunun “açıq-aşkar uğursuzluq” olduğunu düşünür. Sorğu 2022-ci il sentyabrın 10-dan 12-dək aparılıb və 8266 nəfər iştirak edib.
Bütün bunların nəticəsində görünən odur ki, Ukrayna müharibəsi ilə bağlı Rusiya hakimiyyət orqanlarının dezinformasiya verməsi artıq rusdilli mediaya da çıxıb və bu, ikrahla qarşılanır. Sözügedən məsələ ilə bağlı yayılan rəsmi informasiyalar ölkə ictimayəti tərəfindən ciddi qəbul olunmur.
“Bunlar bir məqamı nəzərə almırlar ki, dünya internet əsrində yaşayır, alternativ mənbələr var”
Məsələyə münasibət bildirən media eksperti Yadigar Məmmədlinin fikrincə, belə vəziyyətin yaranacağı gözlənilən idi: “Ona görə ki, Vladimir Putin prezident olandan sonra Rusiya mətbuatı zamanla müstəqilliyini itirdi. Doxsanıncı illərdə belə deyildi. Ölkədə kifayət qədər müstəqil media resursu var idi və ictimai rəyin formalaşmasında vacib rol oynayırdılar. Ancaq indi bundan əsər-əlamət qalmayıb. Rus mediası tərəfsiz informasiyanın yayılmasına deyil, siyasətə xidmət edir. Rusiya mediası nəinki ölkə siyasəti ilə bağlı məsələlərdə, digər məsələlərdə də tərəfsizliyimi itirib. Biz bunu 44 günlük Vətən müharibəsində Azərbaycana münasibətdə gördük. Rusiya mətbuatı davamlı olaraq Ermənistanın mövqeyinə ağırlıq verirdi. Ukrayna ilə müharibə başlayandan rus mediası birtərəfli informasiya siyasəti yeridir. Ölkədə müstəqil mətbuat demək olar qalmayıb. Kremldən gələn tezislərə əsasında fəaliyyət göstərirlər. Ancaq bunlar bir məqamı nəzərə almırlar ki, dünya internet əsrində yaşayır, alternativ mənbələr var. Sosial media insanların həyatının ayrılmaz hissəsinə çevrilib. Belə olan halda əlbəttə ki, rus ictimayəti Rusiya Müdafiə Nazirliyinin yaydığı məlumatlara inanmaz. Görünür vəziyyət son dərəcə kritik olduğu üçün sözügedən məsələ rus mediasında müzakirələrə səbəb olub”.
Media eksperti onu da əlavə etdi ki, müstəqil olmayan mediaya inam artmayacaq.
Vidadi ORDAHALLI
