Rusiya-Ukrayna müharibəsi səbəbindən ABŞ və Avropa ölkələrinin, eləcə də Rusiyaya qarşı durmağa üstünlük verən ölkələrin daxil olduğu blok Rusiyaya qarşı yeni sanksiyalara hazırlaşır.
Rusiya Avropaya satdığı təbii qazı kəsdikdən sonra G7 ölkələri də Rusiya neftinin qiymətinə son hədd tətbiq etmək qərarına gəlib.
Qeyd edək ki, bir neçə gen əvvəl G7 ölkələrinin maliyyə nazirləri Rusiyanın Ukraynaya hücumlarına qarşı atılacaq addımları və müharibənin qlobal iqtisadiyyata mənfi təsirlərinə cavab tədbirlərini müzakirə etmək üçün onlayn görüş keçirib.
Görüşdən sonra verilən birgə bəyanatda Rusiyanın işğal cəhdinin qlobal iqtisadiyyatda qeyri-sabitliyə səbəb olduğu, qlobal enerji və ərzaq təhlükəsizliyini təhdid etdiyi vurğulanır və bildirilir ki, G7 ölkələri Ukraynanın yanında olmada davam edəcək. Açıqlamada G7 ölkələrinin Rusiyanın aqressiv mövqeyinə cavab olaraq tətbiq etdiyi koordinasiyalı sanksiyaları davam etdirməkdə qərarlı olduqları bildirilib və Rusiya neftinə tavan qiymət tətbiq etməkdə razılaşdıqları bildirilib.
Qeyd edilib ki, Moskvanın gəlirlərini azaltmaq və enerji qiymətlərində artımın qarşısını almaq məqsədi daşıyan qərar çərçivəsində neftayırma zavodlarına və kommersiya alıcılarına Rusiya xam neftini yalnız G7 koalisiyasının təyin etdiyi tavan qiymətlə idxal etməsinə icazə veriləcək.
ABŞ başda olmaqla G7 ölkələrinin Rusiya neftinə tavan qiymət tətbiq etmək cəhdlərini dəyərləndirən Rusiya Baş nazirinin müavini Aleksandr Novak bu təşəbbüsləri "cəfəngiyyat" adlandırıb.
"Dünyanın enerji təhlükəsizliyini təmin edən neft bazarının işinə müdaxilə bazarda sabitliyi pozacaq. Bu, bazarı tamamilə məhv edəcək" - Novak deyib.
O, vurğulayıb ki, Rusiya neftinin qiymətinə məhdudiyyətlər qoyulsa, bu cavab verəcəklər: "O zaman biz də məhdudiyyətlər tətbiq edəcəyik. Biz bazardan kənar şəraitdə işləməyəcəyimiz üçün bu cür şirkətlərə və ya ölkələrə neft və neft məhsulları tədarük etməyəcəyik".
Baş nazirin müavini əlavə edib ki, OPEC və OPEC-ə daxil olmayan bəzi istehsalçı ölkələrdən ibarət OPEC+ qrupu, eləcə də Çin və Hindistan sözügedən təşəbbüsü dəstəkləmir.
Qeyd edək ki, G7 ölkələri, xüsusilə ABŞ, Rusiyanın enerji gəlirlərini azaltmaq üçün Rusiya neftinə tavan qiymət tətbiq etmək istəyir.
ABŞ-ın maliyyə naziri Janet Yellen, Rusiya neftinin qiymətinə yuxarı hədd tətbiq edilməsində əldə edilən əhəmiyyətli irəliləyişlə bağlı nikbinliyini ifadə edib.
Tahir TAĞIYEV
