Rusiya prezidenti Vladimir Putinin ən güvəndiyi şəxslərdən olan və “Putinin müəllimi”, “Putinin beyni” kimi tanınan politoloq Aleksandr Duqinin qızı Darya Duqin maşınına qoyulan bombanın partlaması nəticəsində dünyasını dəyişib.
Hadisə ötən gecə baş verib. Əldə edilən məlumata görə, Aleksandr Duqin köməkçisi və mətbuat katibi vəzifəsində çalışan Darya ilə birlikdə Moskva yaxınlığındakı Zaxarovada keçirilən musiqi festivalına qatılıb. Festival çərçivəsində Duqin “Ənənə və tarix” mövzusunda mühazirə oxuyub.
Festivalda olan skripkaçı Piter Lundstremin ifadələrinə görə, proqramdan sonra şəxsi maşını ilə Moskvaya getməsi gözlənilən Duqin maşınını qızına verib və özü başqa maşınla gedib.
Darya Duqinanın istifadə etdiyi cip isə saat 21:30-da Zaxarovadan 3 kilometr uzaqlaşdıqdan və 10 dəqiqə keçdikdən sonra partlayıb. Partlayışın təsiri ilə yol kənarındakı binaya çırpılan avtomobil alovlanmağa başlayıb. 30 yaşlı Duqina avtomobildə dəhşətli şəkildə yanaraq ölüb.
Hadisə yerinə gələn Duqin başını əlləri arasına alıb və uzun müddət şok keçirib.
Rusiya mətbuatında partlayışla bağlı şərhlərin çoxunda “birbaşa Aleksandr Duqini hədəfə alan sui-qəsddə atasının avtomobilini idarə edən qızı həyatını itirdi” kimi dəyərləndirmələr önə çəkilir.
Duqinanın dostu Andrey Krasnov da eyni fikirdədir: "Bu, atasının maşını idi. Darya başqa maşın sürürdü, amma bu gün o, atasının maşınını götürdü və Aleksandrın da onunla getməsi planlaşdırılırdı. Amma Aleksandr başqa yolla getdi. Qayıdanda faciə ilə üzləşdi. Başa düşdüyü qədər əsas hədəf Aleksandr idi".
Partlayış paytaxt Moskvadan 20 kilometr qərbdə baş verib. Şahidlərin bildirdiyinə görə, partlayış çox şiddətli olub və avtomobil dərhal alov alıb.
Ərazidə araşdırma aparan Rusiya qrupları partlayışda ölən şəxsin Darya Duqin olduğunu təsdiqləyib. Rusiya polisi, partlayışın böyük ehtimalla avtomobilin içərisinə yerləşdirilən cihazla baş verdiyi qənaətindədir.
Putinə yaxınlığı ilə tanınan və “Donetsk Xalq Respublikasının” rəhbəri Denis Puşilin hücuma görə Ukraynanı ittiham edib. Telegram-dan açıqlama verən Puşilin, “Ukrayna rejimi Aleksandr Duqini öldürmək istəyərkən onun qızını yox etdi. Darya əsl rus qızı idi” deyib.
Hökumətdə rəsmi post tutmayan Duqin Putinyönlü Tsargrad TV-nin baş redaktoru kimi tanınır. Qərbdə onun Putin üzərində ciddi təsirə malik olduğunu düşünürlər. Duqin tez-tez deyirdi ki, Rusiya ekspansionist siyasət yürütməlidir.
ABŞ Maliyyə Nazirliyi Duqin və qızı Daryaya qarşı da sanksiyalar tətbiq edib. Darya Duqina “United World International”ın baş redaktoru idi. Bu təşkilat 2016-cı ildə Donald Tramp və Hillari Klinton arasında keçirilən prezident seçkilərinə müdaxilədə ittiham olunurdu.
Tahir TAĞIYEV
