Bəhreynin mədəniyyət naziri Şeyxa Mey Məhəmməd bint Xəlifənin Manamada iştirak etdiyi dəfn mərasimində İsrail səfiri Eitan Na'ehlə əl sıxmaqdan imtina etdiyi və mərasimi tərk etdiyi üçün vəzifəsindən uzaqlaşdırılıb.
Bu barədə Ərəb və İbrani dillərində yayımlanan xəbər ağentlikləri məlumat yayb. İddialara görə, insident keçən ay ABŞ-ın Manamadakı səfiri Stiven Bondinin atasının dəfn mərasimində baş verib.
Bildirilib ki, Bəhreynin keçmiş mədəniyyət naziri və eyni zamanda kral ailəsinin qadın üzvü Mey Məhəmməd bint Xəlifə İsrail səfiri ilə görüşməkdən və əl sıxmaqdan imtina edib.
Məlumata görə, Şeyxa Mey dəfn mərasimini tərk edib, ABŞ səfirliyindən isə onun mərasimdə iştirak etdiyi fotoları yaymamağı xahiş edib.
“Jerusalem Post”un məlumatına görə, 20 ildir ölkədə mədəniyyət naziri vəzifəsini icra edən Şeyxa Mey iyulun 21-də kralın fərmanı ilə edilən kabinet dəyişikliyi zamanı vəzifəsindən azad edilib.
Xəbərdə İsrailin baş naziri Yair Lapidin həmin gün Bəhreynin vəliəhdi və baş nazir Salman bin Hamed bin İsa Əl-Xəlifə ilə telefon danışığı olduğu və görüşdə "ikitərəfli əlaqələrə xüsusi diqqət yetirildiyi" vurğulanıb.
Bəhreyn hökumətinin sözçüsü mediada yer alan iddialardan sonra verdiyi yazılı açıqlamada Şeyxa Meyin 20 ildən artıqdır Bəhreyn hökumətində vəzifə tutduğunu və kabinetdə edilən dəyişikliklərin tarixin ən əhatəli hökumət dəyişiklikləri olduğunu deyib: “Bəhreyn və bu dəyişikliklər yanlış şərh edilməməlidir”.
Bununla belə, HƏMAS-ın sözçüsü Hazim Qasim bəyan edib ki, Bəhreyn nazirinin İsrail səfirinin əlini sıxmaqdan imtina etməsi “Bəhreyn xalqının Fələstin xalqına səmimi dəstəyinin əsl nümunəsidir”.
İsrail və Bəhreyn 2020-ci ildə imzaladıqları diplomatik normallaşma sazişlərindən sonra münasibətlərini sürətlə inkişaf etdirməyə başlayıblar.
İsraildən bir çox yüksək vəzifəli şəxslər, o cümlədən baş nazir, xarici işlər naziri və müdafiə naziri Bəhreynə səfər ediblər. KİV-in məlumatına görə, Təl-Əviv administrasiyası Bəhreynlə pilotsuz uçuş aparatları və müdafiə sistemlərinin satışı ilə bağlı razılığa gəlib.
Bəhreyn ölkəsindəki şiə əhalisi və coğrafi yaxınlığına görə, İranı milli təhlükəsizli üçün bir nömrəli təhdid hesab edir. İsrail də Tehran administrasiyasını və onun nüvə fəaliyyətlərini əsas təhlükə hesab edir.
Tahir TAĞIYEV
