Macarıstanın baş naziri Viktor Orban bildirib ki, Rusiya-Ukrayna müharibəsi onların müharibəsi deyil və Rusiya özündən qat-qat güclü olan NATO-ya heç vaxt hücum etməyəcək.
Baş nazir Viktor Orban Rumıniyada iştirak etdiyi tədbirdə Rusiyanın Ukraynanı NATO üzvü etməmək kimi açıq təhlükəsizlik tələbləri ilə çıxış etdiyini xatırladıb. O, ABŞ-ın keçmiş prezidenti Donald Tramp və keçmiş Almaniya kansleri Angela Merkel vəzifələrində qalsaydılar, müharibənin heç vaxt başlamayacağını iddia edib.
Orban Rusiya-Ukrayna müharibəsi ilə bağlı strategiyasının uğursuz olduğunu ifadə etdiyi Avropanın vəziyyətini “dörd təkəri də partlamış avtomobil”ə bənzədib. Orban Avropanın strategiyasını dəyişərək tezliklə sülh üçün səy göstərməli olduğunu söyləyib: "İndi Aİ rusların və ya ukraynalıların tərəfində deyil, daha çox ikisinin ortasında olmalıdır".
Rusiya-Ukrayna müharibəsinin Polşa, Çexiya, Macarıstan və Slovakiyanın yaratdığı Vişeqrad Qrupu ölkələrinin (V4) əməkdaşlığına da təsir etdiyini vurğulayan Orban, Rusiya-Ukrayna müharibəsini iki slavyan xalqı arasında müharibə kimi qiymətləndirdiyini, Polşanın isə bunu öz müharibəsi adlandırdığını deyib.
Qərbin enerji qaynaqları üzərində gücünü itirdiyini deyən Orban 1950-ci ildə ABŞ və Avropanın neft, qaz və kömürün 75 faizinə nəzarət etdiyini, bu gün isə bu nisbətin 35 faizə endiyini bildirib.
Tahir TAĞIYEV
