Rusiya prezidenti Vladimir Putin Rusiya parlamentinin aşağı palatası Dumada təmsil olunan siyasi partiyaların rəhbərləri və sözçüləri ilə görüşüb. Kreml sarayında keçirilən görüşdə çıxış edən Putin Qərb ölkələrinin siyasətlərinə və Rusiyanın Ukraynadakı hərbi əməliyyatlarına toxunub.
Qərb ölkələrinin Rusiyaya qarşı döyüş meydanında həmlə etmək üçün fürsət gözlədiyi barədə məlumatlar aldığını ifadə edən Putin deyib: “Ukraynada müharibəni Rusiya deyil, kollektiv Qərb başlatdı. Bu gün eşidirik ki, bizi döyüş meydanında məğlub etmək istəyirlər. Qoy cəhd etsinlər. Biz eşidirik ki, Qərb bizimlə son ukraynalıya qədər vuruşmaq istəyir. Bu, ukraynalılar üçün faciədir. Amma hamı bilməlidir ki, biz hələ heç nəyə başlamamışıq”.
Qərbin "totalitarizmə doğru degenerasiyaya uğradığını" iddia edən Putin, "Bu, çoxqütblü dünyaya keçidin başlanğıcıdır. Qərb Rusiyanı idarə edə bilmədi" deyib.
Sanksiyaların onlar üçün çətinlik yaratdığını, lakin gözlənilən ölçüdə olmadığını ifadə edən Putin bildirib ki, ABŞ başda olmaqla Qərb dünyası xüsusilə son 10 ildə çox aqressiv Rusiya siyasəti həyata keçirir.
Putin sülh danışıqlarını rədd etmədiklərini söylədi, bununla belə, o bildirib ki, proses nə qədər uzansa, onlarla razılığa gəlmək bir o qədər çətinləşir.
Ukraynadakı əməliyyatlarla bağlı Qərb ölkələrinin onlara qarşı apardığı təbliğata cavab olaraq dünyada onları dəstəkləyən insanların olduğunu bildirən Putin deyib ki, ABŞ daxilində, Avropada və hətta digər qitələrdə çoxlu tərəfdarlarımız var.
Qərb ölkələrinin onlara qarşı başlatdığı sanksiyaları tənqid edən Putin daha sonra deyib: “Rusiyaya qarşı verilən qeyri-qanuni qərarlar bizim üçün çətinlik yaradır. Amma Rusiyaya qarşı iqtisadi hədə-qorxuya başlayanlar üçün bu, etibarlı bir şey deyil. Məqsədləri cəmiyyətimizdə nifaq salmaq, qarışıqlıq salmaq, insanları ruhdan salmaq idi. Amma burada da səhv hesablayıblar. Bundan heç nə alınmadı və əminəm ki, olmayacaq”.
Tahir TAĞIYEV
