Rusiya Ukraynaya həm havadan, həm qurudan həm də dənizdən hücumlarını davam etdirir. Bununla yanaşı Ağ dənizdə də hərbi aktivlik müşahidə olunur. Rusiyanın ən böyük sualtı qayıqları Ağ dənizdə, döyüş meydanından bir neçə mil aralıda və Rusiyanın şimal-qərb sahilləri yaxınlığında görülüb.
Bölgədə iki nəhəng Rusiya sualtı qayığının görünməsi Ukraynaya yeni başqa istiqamətlərdən zərbələr endiriləcəyi açıqlamalarına səbəb olub. Bölgəyə yaxın NATO üzvlüyünə can atan İsveç və Finlandiyanın da təhlükə altında ola biləcəyi iddia edilir.
İyunun 26-da Hərbi Dəniz Qüvvələrinin analitiki H.İ. Sutton Açıq Mənbə Kəşfiyyatına istinadən dünyanın ən böyük iki sualtı qayığının – “Belqorod” (K-239) və “Dmitri Donskoy”un (TK-208) Ağ dənizdə görüldüyünü açıqlayıb. O, həmçinin bu sualtı qayıqların nəhəng olduğunu və hətta Qərbdəki analoqlarından çox daha böyük olduğunu iddia edib.
Rusiyanın Uzaq Şərq limanlarını ölkənin şimal-qərbindəki iqtisadi cəhətdən aktiv rayonları və digər yaxın ölkələri ilə birləşdirən Ağ dəniz, Rusiyanı Avropa su yolları şəbəkəsinə birləşdirir.
Hərbi analitik Cozef Çakkonun fikrincə, kanal çox dərin olmadığı üçün sualtı qayıqlar su səthinə çıxıb.
Sualtı qayıqların tezliklə NATO üzvü olacaq Finlandiya və İsveçlə əlaqəsi olub-olmadığını gəlincə Çakko deyib: "Bunlar yalnız uzaqmənzilli ballistik raketlər istifadə edən strateji sualtı qayıqlardır. Skandinaviyalılara qarşı hücum üçün “İskəndər” raketi də kifayət edərdi. Deməli, sualtı qayıqlar ya Rusiyanın ətrafını qoruyur, ya da müntəzəm olaraq təlim keçirlər”.
“Dmitri Donskoy” (TK-208) nüvə ballistik raket sualtı qayığı Rusiya Hərbi Dəniz Qüvvələrinin əsas parçasıdır və onun NATO hesabatında adı "Tayfun"dur. 175 metr uzunluğundakı sualtı qayıq 1980-ci ildən istismardadır və istismar müddəti ərzində üzərində əhəmiyyətli təkmilləşdirmələr aparılıb. Gəminin təxminən 160 nəfərlik heyəti və 48.000 ton ağırlıqla üzmə qabiliyyəti var.
Sualtı qayıq güclü raketləri sayəsində hədəfi olan gəmilərə dalğa şəklində raket hücumu həyata keçirə bilir. Bu sualtı qayıqlar həm də dünyanın istənilən yerindən gizli şəkildə nəhəng ballistik raketlər buraxa bilir.
Rusiyanın TASS dövlət xəbər agentliyi “Dmitri Donskoy”un ən azı daha beş il xidmətdə qalacağını bildirib. Bu sualtı qayıq Ağ dənizdə də görülən “Belqorod”a qədər dünyanın ən böyük sualtı qayığı idi.
“Belqorod”, Oscar-II qanadlı raket sualtı qayığının yarımçıq gövdəsindən tikilmiş kifayət qədər böyük, gizli, xüsusi dizayn edilmiş nüvə sualtı qayığıdır. Onun Klavesin-2R kimi sualtı dronlardan tutmuş “Losharik” miniatür sualtı qayıqlarına qədər hər şeyə uyğun olduğuna inanılır.
Tahir TAĞIYEV
