Rusiyanın fevralın 24-də Ukraynada başlatdığı hərbi əməliyyat davam edir. Vladimir Putinin yaxın müttəfiqi, Rusiya parlamentinin müdafiə komitəsinin üzvü Andrey Qurulyov dünyanı qorxudan açıqlamalar verib.
A.Qurulyov Rusiya dövlət televiziyasında canlı yayımda Üçüncü Dünya Müharibəsi başlamazdan əvvəl bombalanacaq ilk hədəflərlə bağlı xəbərdarlıq edib.
A.Qurulyov Qərbin Rusiyanın Kalinqrad anklavını blokadaya almasının qarşısını almağın yeganə yolunun Baltikyanı ölkələri ələ keçirmək olduğunu iddia edib. Bu baş verərsə, dərhal NATO-nun beşinci maddəsi işə düşəcək və Üçüncü Dünya Müharibəsinə səbəb olacaq.
Vladimir Putin tərəfdarı olan “Vahid Rusiya”nı təmsil edən general-leytenant bununla bağlı soyuqqanlı bəyanatlar verib: “Biz ilk hava əməliyyatı zamanı düşmənin bütün kosmik peyklərini məhv edəcəyik…
Onların amerikalı və ya ingilis olması heç kimin vecinə olmayacaq, biz onların hamısını NATO kimi görürük. İkincisi, biz bütün raket əleyhinə müdafiə sistemini sıradan çıxaracağıq. Üçüncüsü, biz əlbəttə ki, Varşavadan, Parisdən və ya Berlindən başlamayacağıq. İlk vurulacaq yer London olacaq. Çox aydındır ki, dünya üçün təhlükə anqlo-saksonlardan gəlir”.
Putinin bir çox digər yaxın müttəfiqləri kimi, general-leytenant Qurulyov da hesab edir ki, Qərb Üçüncü Dünya Müharibəsinə dözə bilməyəcək. "Kritik ərazilərin məhv edilməsi əməliyyatı çərçivəsində Qərbi Avropanın enerji təchizatı kəsiləcək və iflic vəziyyətinə düşəcək", - deyə Qurulyov deyib.
O bütün güc mənbələrinin məhv ediləcəyini bildirib: "Üçüncü mərhələdə ABŞ-ın soyuqda, yeməksiz, işıqsız müharibəsini davam etdirməyə çalışan Qərbi Avropaya nə deyəcəyini görəcəyik. Plan ümumilikdə belədir. Bəzi hissələri demirəm, çünki bunlar televiziyada müzakirə olunacaq mövzular deyil”.
Bununla belə general digər rusiyalı ekspertlərin, NATO dövlətlərinin Kalininqradı ələ keçirmək üçün Litva üzərindən dəhliz yaratmaq planları barədə iddialarını dəstəkləmir.
Qeyd edək ki, Rusiya NATO üzvü Litvanı açıq şəkildə hədələyib. Moskva Avropanın mərkəzində yerləşən ərazisi Kalininqrada qatarların getməsinə icazə verməyən Litvaya məhdudiyyətləri “dərhal” qaldırmağı tələb edib.
Rusiya Xarici İşlər Nazirliyi Aİ sanksiyaları çərçivəsində görülən tədbirləri “düşməncəsinə” məhdudiyyətlər kimi qiymətləndirərək, geri addım atılmadığı təqdirdə Moskvanın öz milli maraqlarını qorumaq üçün addım atacağı ilə hədələyib.
Baltikyanı ölkə Litva ötən həftə Rusiyadan Kalininqrada malların tranzitinə qadağa qoyub. Qadağa Aİ-nin sanksiyalar paketinə daxil olan kömür, metallar, tikinti materialları və yüksək texnologiyalı məhsulları əhatə edir.
Rusiya ilə quru əlaqəsi olmayan Kalininqrad 1945-ci ildə İkinci Dünya Müharibəsinin sonunda müharibədə uduzan Almaniyadan alınaraq Rusiya ərazisinə çevrilib. Baltik dənizinə açılan və Aİ üzvləri ilə quru qonşusu olan regionun strateji əhəmiyyəti Moskva üçün çox böyükdür.
Aİ-nin sanksiyalar siyahısına kömür, metallar, tikinti materialları və qabaqcıl texnologiya məhsulları daxildir. Kalininqrad vilayətinin qubernatoru Anton Alixanov bildirib ki, bu qadağalar Kalininqradın idxal etdiyi məhsulların təxminən 50 faizini əhatə edir.
Tahir TAĞIYEV
