İsveç və Finlandiyanın NATO üzvlüyünə veto qoyan və şərtlərini iki ölkəyə çatdıran Türkiyə, Qərblə diplomatik danışıqlarda Şimali Kipr Türk Cümhuriyyətinin (ŞKTC) NATO ölkələri tərəfindən tanınmasını gündəmə gətirəcəyi iddia edilir.
Bununla bağlı İngiltərə mətbuatı məlumat yayıb. “Daily Express” qəzeti yazır ki, Türkiyə Finlandiya və İsveçin NATO-ya qəbul prosesi ilə bağlı aparılan danışıqlarda ŞKTC-nin statusunu müzakirə masasına gətirəcək.
Qəzetə danışan ŞKTC prezidenti Ersin Tatara yaxın mənbə, sözügedən tələbin Tatar tərəfindən prezident Ərdoğana çatdırıldığını deyib: "Çağırış olub, bundan xəbərim var. Anladığım qədəri ilə müsbət cavab da olub. Yunanıstan və Kipr Rum Administrasiyası AB-də davamlı olaraq veto hüququndan istifadə edir. Haqsızlığa son qoymağın vaxtıdır".
Türkiyənin ŞKTC-nin tanınması ilə bağlı təzyiqləri artıra biləcəyi bildirilir.
Məsələni Britaniya rəsmiləri ilə müzakirə edən “Daily Express”, Britaniya hökumətinin ŞKTC-nin tanınmasına müsbət yanaşdığını bildirib.
Qeyd edək ki, İsveç və Finlandiya terror təşkilatı PKK/YPG-yə siyasi və hərbi dəstəyinə görə, NATO-ya üzvlüklə bağlı Türkiyənin vetosu ilə üzləşib.
Tahir TAĞIYEV
