Rusiyadan canlı yayımda nüvə təhdidi - Finlandiya on saniyədə yer üzündən silinəcək...

img

Rusiya parlamentinin müdafiə komitəsindəki Putinin müttəfiqi “Rodina” partiyasının rəhbəri Aleksey Juravlyov Finlandiya və Britaniyanı nüvə silahları ilə təhdid edib.

O, Britaniyanı nüvə silahı ilə vurmaqla hədələyib və bunun cəmi üç dəqiqə çəkəcəyini iddia edib. Dumanın müdafiə komitəsinin sədr müavini bildirib ki, NATO-ya daxil olmağa hazırlaşan Finlandiya on saniyə ərzində yer üzündən silinəcək.

Juravlyovun açıqlamanı Rusiyanın dünən səhər Finlandiyaya elektrik enerjisinin verilişini kəsməsindən sonra canlı yayımda verib. Skandinaviya ölkəsi elektrik enerjisinin on faizini Rusiyadan idxal edirdi.

Juravlyov deyib ki, əgər Finlandiya bu bloka qoşulmaq istəyirsə, bizim hədəfimiz tamamilə qanunidir: "ABŞ dövlətimizi təhdid edir: Buyurun, sizin üçün “Sarmat” (Şeytan-2 raketi)! Rusiyanın var olmamasını düşünürsünüzsə, sizin yerinizdə nüvə külü olacaq. Finlandiya isə ABŞ-la bir olduğunu deyir. Yaxşı, sıraya girin. Finlər ümumilikdə dövlət olduqları üçün, Finlandiyanın bir ölkə kimi mövcudluğuna görə, Rusiyaya minnətdar olmalıdırlar".

Rusiyanın Finlandiya sərhədinə nüvə silahları yerləşdirib-yerləşdirməyəcəyinə gəlincə, Juravlyov deyib: "Nə üçün? Bu bizə lazım deyil. Biz onu Sibirdən “Sarmat”la vura bilərik, hətta İngiltərəni də vura bilərik. Və Kalininqraddan hücum etsək... Hipersoniklərin hədəfə çatma sürəti 200 saniyədir! Davam edin bəylər. Finlandiya sərhədində bizim strateji silahlarımız yox, 20, hətta 10 saniyəyə Finlandiyaya çatacaq Kinzhal sinifli silahlarımız olacaq”.

Juravlyov Rusiyanın qərb cinahında hərbi qüvvələrini böyük ölçüdə gücləndirəcəyini də bildirib və Finlandiyanın NATO-ya daxil olması üçün ABŞ və İngiltərənin təxribatına məruz qaldığını iddia edib: "Finlərin bizimlə bölüşəcək heç bir şeyi yoxdur. Qazın 90 faizindən çoxunu, taxtanı bizdən alırlar. İlk növbədə döyüşmək kimə lazımdır? Finlərəmi? Rusiyanın onlara hücumundan qorxmurlar. Təbii ki, tez ya tez amerikalılar onları buna məcbur edəcək. Ukraynanı təhrik etdikləri kimi, Polşanı və Rumıniyanı da təhrik etməyə çalışırlar. Göründüyü kimi, qazanacaqları da olur.

Finlandiyanın NATO-ya üzv olub bizə qarşı əvvəlki kimi davranacağını söyləmək mümkün deyil, bu, olmayacaq. Amerikalılar onları təxribata təhrik edəcək. Biz uzun müddətdir səbr edirik. Amma bu, əbədi davam edə bilməz".

Juravlyov həmçinin iddia edirdi ki, ABŞ Üçüncü Dünya müharibəsinin baş verməsi üçün əlindən gələni edəcək: "Onlar nüvə hücumlarına yol açmamağa çalışacaqlar, lakin bütün Avropanı Rusiya ilə münaqişəyə cəlb etməyə, Asiyada vəziyyəti alovlandırmağa və mümkün qədər çox ölkəni qarışdırmağa çalışacaqlar. Onlar üçün bu, daxili iqtisadi böhrandan çox yaxşı bir çıxış yolu olacaq. Birinci və İkinci Dünya Müharibəsində olduğu kimi bütün problemlərini müharibəyə bağlaya biləcəklər. Onlar böhrandan ancaq Avropadakı müharibə sayəsində çıxdılar. Amma böyük təhlükə var: Nüvə raketlərinin uçmayacağına kim zəmanət verir? Mən zəmanət vermirəm”

Juravlyov Rusiyanın varlığına təhlükə yaranarsa, nüvə silahından istifadə edəcəklərini deyib. Baltikyanı ölkələr Litva, Latviya və Estoniya ilə bağlı isə Rusiyanın lazım gəldikdə onları əzəcəyini deyib: "Onlar üfunət iyli böcəkləri kimi iyrəncdirlər. Amma lazım gələrsə, əziləcəklər".

Tahir TAĞIYEV

Peşə etikası

Son xəbərlər