Rusiya-Qərb gərginliyi Skandinaviyaya sıçradı - Moskva Finlandiyanın qazını kəsir
Gözlənilən xəbər Finlandiyadan gəldi və ölkə NATO-ya üzvlük üçün addım atıldığını açıqladı. Bazar ertəsi qonşu İsveçin də oxşar bəyanatla çıxış edəcəyi gözlənilir.
Finlandiya prezidenti Sauli Niinistö və Finlandiyanın baş naziri Sanna Marin birgə bəyanatda bildiriblər ki, “NATO-ya üzvlük Finlandiyanın təhlükəsizliyini gücləndirəcək. Finlandiya gecikmədən NATO-ya üzvlük üçün müraciət etməlidir... Ümid edirik ki, bu qərarın qəbulu üçün lazım olan milli addımlar yaxın bir neçə gün ərzində sürətlə atılacaq”.
Fevral ayında Rusiyanın Ukraynaya hücumlarından sonra sorğular Finlandiyanın NATO-ya daxil olmasına ictimai dəstəyin 30 faizdən 80 faizə yüksəldiyini göstərir.
Finlandiya parlamentdə müzakirələrdən sonra bazar günü NATO ilə bağlı qərarını rəsmən elan edəcək. Niinistö, Finlandiyanın NATO-da iştirakının Rusiyanı provokasiya edib-etməyəcəyi ilə bağlı suala cavab olaraq, əsas səbəbkarın Rusiya lideri Vladimir Putin olduğunu ifadə edib: “Mənim cavabım “Sən buna səbəb oldun, güzgüyə bax” olacaq”.
Finlandiya Rusiya ilə 1300 kilometr sərhədi bölüşür. Finlandiyanın üzvlüyü ilə NATO-nun Rusiya ilə birbaşa sərhədi əhəmiyyətli dərəcədə artacaq. Əvvəllər Rusiya ilə NATO arasında sərhəd yalnız Baltikyanı dövlətlərdən, Norveçin çox kiçik bir bölgəsindən və Rusiyanın Baltik dənizindəki Kalininqrad bölgəsindən ibarət idi.
Gözlənildiyi ki, Rusiya Finlandiyanın NATO qərarına çox sərt reaksiya verib. Kremlin sözçüsü Dmitriy Peskov deyib ki, Finlandiyanın NATO-ya üzvlüyü Rusiya üçün müəyyən təhlükə yaradacaq. Rusiyanın bundan sonra atacağı addımlara gəlincə Peskov deyib ki, atacağımız addımlar NATO-nun hərbi infrastrukturunun Rusiya sərhədlərinə yaxınlaşmasına görə müəyyənləşəcək. Peskov xatırladıb ki, Rusiya prezidenti Putin NATO-nun şərq cinahlarının gücləndirilməsi ilə yanaşı qərb cinahının gücləndirilməsi üçün tədbirlərin hazırlanması barədə göstəriş verib.
Finlandiyaya parlamentarilər Putin sabah qaz tədarükünü dayandıraraq NATO-ya üzv olmaq niyyətini elan edən Finlandiyaya cavab verə biləcəyindən qorxurlar. Finlandiya mətbuatının yazdığına görə, finlandiyalı qanunvericilərə NATO-ya üzvlük elanına cavab olaraq Rusiyanın qaz ixracının sabah dayandırıla biləcəyi barədə xəbərdarlıq edilib. Putinin mayın 23-dək qaz axınını kəsərək Helsinkidən qisas alacağına dair narahatlıqlar var idi, lakin indi Kremlin daha tez hərəkətə keçə biləcəyi düşünülür. Finlandiyanın Əsas Parlament Qrupunun rəhbəri Ville Tavio bildirib ki, “bunun üçün hazırlıq görülüb, biz belə bir şey gözləyirdik”.
Tahir TAĞIYEV
