Bu günlərdə Rusiya Müdafiə Nazirliyi “Sarmat” qitələrarası ballistik raketinin ilk buraxılış sınağının uğurla həyata keçirildiyini açıqlayıb.
Rusiya prezidenti Vladimir Putin isə raketin buraxılışı ilə bağlı "Bu silah aqressiv ritorikanın hərarəti ilə bizi təhdid etməyə çalışanları bir daha düşünməyə vadar edəcək", ifadələrini işlədib.
Rusiyanın "Rossiya 1 TV" telekanalında Qərbin “şeytan” adlandırdığı qitələrarası "Sarmat" ballistik raketinin potensialı və təhlükə gücü qiymətləndirilib.
Aparıcının "ABŞ-ın bu səviyyədə silahı yoxdur, mən bunu heç eşitməmişəm. Raketin gedəcəyi istiqamət Amerika qitəsidir. Ən pis ssenari reallaşdıqda raketin hədəfi hara olar, nə qədər böyük bir sahəyə təsir edə bilər?" sualına şərhçinin cavabı birmənalı olub.
“7,5 meqatonluq bomba atılanda Nyu-York kimi bir hədəf tək bir raketlə tamamilə məhv edilər. Amerikalıların bizim raketlərimizdən həmişə qorxması onların xeyrinədir” - şərhçi deyib.
Qeyd edək ki, Rusiya Müdafiə Nazirliyi “Sarmat”ı dünyanın ən güclü qitələrarası raketi kimi təqdim edib. NATO Rusiyanın yeni raketini “Şeytan 2” adlandırıb. Sarmat 1962-ci ildə dizayn edilmiş Sovet istehsalı olan “Voevoda”nı əvəz edəcək. Voevoda üç döyüş başlığı daşıya bilirdi. “Voevoda”ya NATO “SS-18 Şeytan” adı vermişdi. Bu səbəbdən Qərb yeni raketi “Şeytan 2” adlandırır.
“10-15 nüvə başlığına sahib, 18 min kilometr mənzilə malik “Sarmat” raketi Şimal və Cənub qütblərini keçərək hədəfə çatma qabiliyyətinə malikdir. Təxminən 200 ton ağırlığında və qısa müddətli aktiv uçuş xüsusiyyətləri ilə “Sarmat”ın mövcud raketdən müdafiə sistemləri tərəfindən qarşısının alınmasının mümkünsüz olduğu iddia edilir.
Hərbi analitiklər Rusiyanın uzaq qərbindən buraxılarsa, onun Londonu 13 dəqiqəyə vura biləcəyini deyir.
Raket tamamilə Rusiya istehsalı olan hissələrdən ibarət olduğundan, sanksiyalar onun aktivləşməsinə mane olmayacaq. Rus ordusu “Sarmat”ı ilin sonuna kimi hazır vəziyyətə gətirəcək.
Tahir TAĞIYEV
