Kiyevdən çəkildikdən sonra diqqətini Donbasa yönəldəcəyini rəsmən açıqlayan Rusiya ordusu bu gün yaydığı açıqlama ilə dünyaya yeni hədəfini bəyan edib.
Rusiya ordusu “xüsusi hərbi əməliyyat” adlandırdığı işğalın ikinci pərdəsində Donbas bölgəsinə tam nəzarəti təmin etməklə yanaşı, ölkənin cənubunun da hədəflər arasında olduğunu açıqlayıb.
Putinin 2014-cü ildə işğal etdiyi Krıma birbaşa quru əlaqəsinin planlaşdırıldığını bildirən Rusiya ordusu, Ukraynanın cənubunun tamamilə nəzarət altına alınacağı təqdirdə buradan Moldovaya da yol açacağını hədəfləyir. Açıqlamada Moldovada rusiyapərəst separatçıların nəzarətində olan Dnestryanı bölgəyə qapının açılacağı qeyd edilir.
Rusiya Silahlı Qüvvələri Mərkəzi Hərbi Dairəsinin komandanının müavini Rüstəm Minnekayev bildirib ki, Rusiya ordusunun Ukraynadakı müharibənin ikinci mərhələsində vəzifələrindən biri Donbas və Ukraynanın cənubuna tam nəzarəti saxlamaqdır. Minnekayev Sverdlovsk vilayətinin müdafiə sənayesi toplantısındakı çıxışında Rusiya ordusunun iki gün əvvəl Ukraynadakı “xüsusi hərbi əməliyyat”ın ikinci mərhələsinə daxil olduğunu xatırladıb.
Minnekayev Donbas üzərində nəzarətin Krıma quru dəhlizinin yaradılmasına və Ukraynaya ciddi təsir göstərməsinə imkan yaradacağını vurğulayıb: “Ukraynanın cənubuna nəzarət etmək, rusdilli əhaliyə basqıların edildiyi Dnestryanına çıxış yolu təmin edəcək”.
Beynəlxalq ictimaiyyət Ukraynanın cənub-qərb sərhədində yerləşən Dnestryanı bölgəni Moldovanın bir hissəsi hesab edir, lakin bu bölgə Moskvanın dəstəklədiyi separatçılar tərəfindən idarə olunur. Dnestryanıda Rusiya qoşunları da yerləşdirilib.
Rusiya ordusunun açıqladığı yeni planda ən önəmli məqam isə Ukraynanın liman şəhəri Odessa ilə bağlıdır. Çünki planın həyata keçirilməsi üçün bu şəhər də işğal edilməlidir. Tarixi şəhər həftələrdir ki, Rusiyanın Qara dənizdən desant çıxarmasına qarşı hazırlaşır. Şəhərin tarixi binaları qum torbaları ilə örtülüb, küçələrdə isə tankların hərəkətinə qarşı maneələr qurulub.
Ukraynanın əsas dəniz bazası Odessada yerləşir. Dəniz bazası əvvəllər Krımda idi, lakin 2014-cü ildə Rusiya yarımadanı ilhaq etdikdən sonra buraya köçürülüb. Əsasən rusdilli bu şəhər olan Odessa limanı Rusiya lideri Putin üçün strateji hərbi hədəf sayılır. Fevralın 21-də Ukraynaya müdaxilədən əvvəl Putin xüsusi ilə Odessadan və 2014-cü ildə Ukrayna millətçiləri ilə toqquşmalardan sonra şəhərdə əksəriyyəti rusiyapərəst olan 48 etirazçının öldüyü “dəhşətli faciə”dən bəhs etmişdi.
Keçmiş Rusiya imperiyasının mühüm limanlarından biri olan Odessa həm də rus mədəniyyətində və tarixində simvolik yer tutur. Şəhərin əsası 1794-cü ildə Rusiyanı idarə edən sonuncu imperator II Yekaterina tərəfindən qoyulub.
Tahir TAĞIYEV
