ABŞ prezidenti Co Bayden Rusiyanın Ukraynaya hücumlarını "soyqırım" kimi xarakterizə etdikdən sonra Fransa prezidenti Emmanuel Makron mövzu ilə bağlı açıqlama verib.
Makron Rusiyanın Ukraynaya hücumunu “soyqırım” kimi xarakterizə edə bilməyəcəyini ifadə edərək, “bu gün belə terminlərlə diqqətli olmalıyıq, çünki ruslar və ukraynalılar qardaşdır” deyib: "Bu müharibəni dayandırmaq və sülhü bərpa etmək üçün əlimdən gələni etmək istəyirəm. Bu cür açıqlamaların sülhə xidmət etdiyinə əmin deyiləm. Rusiyanın hücumları qəbuledilməz və müharibə cinayəti olduğunu deyə bilərəm”.
Avropada misli görünməmiş bir müharibə cinayətinin baş verdiyini bildirən Makron deyib ki, Rusiya birtərəfli olaraq son dərəcə amansız bir müharibə başlatdı: “Rusiya ordusunun hərbi cinayətlər törətdiyi müəyyən olundu, indi cavabdehləri tapmaq lazımdır".
Makronun açıqlamasına etiraz edən Ukrayna Prezident Ofisinin rəhbəri isə deyib ki, Rusiyanın Ukraynada törətdiklərinin soyqırımı olduğunu Beynəlxalq Məhkəmədə sübut edəcəyik.
“Zelenski Rusiyanın Ukraynadakı cinayətlərini soyqırımı adlandırır. ABŞ Prezidenti Cozef Bayden ukraynalıların soyqırımı deyir. Biz Beynəlxalq Məhkəmədə bunu sübut edəcəyik. Demokratiyanın liderləri artıq hər şeyi öz adı ilə çağırır. Təxminən hamısı bu fikirdədir. İnanıram ki, “təxminən” sözü müvəqqətidir.
Rusiyanın təbliğat maşını Buçada törədilənləri “feyk” sayır. Ancaq demokratik sivilizasiya baş verənləri özü görür. Rusiya 21-ci əsrdə Ukrayna xalqını soyqırımı edir. Ancaq onlar Ukraynaya qalib gələ, millətimiz məğlub edə biməyəcəklər. Onları bütün istiqamətlərdə məğlubiyyət gözləyir. Bundan sonra xalqımıza qarşı bütün cinayətlərə görə məsuliyyət daşıyacaqlar”, - Ofisin başçısı Andrey Yermak deyib.
Tahir TAĞIYEV
