Fransada prezident seçkilərinin birinci turunun nəticələrinə əsasən, prezident Emmanuel Makron və ifrat sağçı Marin Le Pen ikinci tura yüksəlib.
“France Info”, “Le Monde” və “France 24” ictimai yayım şirkətlərinin keçirdiyi “exit-poll”un nəticələrinə görə, prezident seçilmək üçün birinci turda heç bir namizəd lazımi 50 faiz mütləq səs çoxluğu əldə edə bilməyib.
Müvafiq olaraq, Makron 28,1 faiz səslə seçkinin ilk turunda qalib gəlib. Le Pen 23,3 faizlə ikinci olub.
İfrat solçu namizəd Jan-Lyuk Melenşon 20,1 faiz, ifrat sağçı Erik Zemmur 7,2 faiz, sağ mərkəzçi Respublikaçılar Partiyasının namizədi Valeri Pekresse 5 faiz səs toplayıb.
Yaşıllar Partiyasının prezidenti və Avropa Parlamentinin üzvü Yannik Jadot 4,4 faiz, Sosialist Partiyasının (PS) namizədi, Paris meri Ann Hidalqo isə 2,1 faiz səs toplayıb.
İlk turda ilk iki yeri tutan Makron və Le Pen aprelin 24-də keçiriləcək səsvermənin ikinci turunda mübarizə aparacaqlar.
Seçkilərin birinci turunun rəsmi nəticələrini aprelin 13-də Konstitusiya Məhkəməsi elan edəcək.
İkinci turda qalib gələn namizəd mayın 13-dək vəzifəsinin icrasına başlayacaq.
Makron və Le Pen 2017-ci ildə prezident seçkilərinin ilk turunu ilk iki yerdə başa vuran namizədlər olub.
Yaşıllar Partiyasının (EELV) prezidenti və 2009-cu ildən Avropa Parlamentinin (AP) üzvü Yannik Jadot, sağ mərkəzçi Respublikaçılar Partiyasının (LR) namizədi və paytaxtın daxil olduğu İle-de-Frans bölgəsinin rəhbəri Valeri Pecresse, sol mərkəzçi Sosialist Partiyasının (PS) namizədi Paris meri Ann Hildaqo və Kommunist Partiyasının (PCF) baş katibi Fabien Roussel ikinci turda "Makrona səs verməyə" çağırıblar.
Pecresse "Marin Le Penin hakimiyyətə gəlməsinin və nəticədə yaranacaq xaosun qarşısını almaq üçün vicdanla Emmanuel Makrona səs verəcəyəm" deyib.
Sərbəst Fransa Hərəkatının (LFI) lideri Jan Lüks Melenşon və Yeni Anti-Kapitalist Partiyasının (NPA) sözçüsü Filip Putu Makrona səs verməklə bağlı açıq çağırış etməyiblər. Poutou "bir səs də ifrat sağa getməməli" deyib, Melenşon isə "Le Penə bir səs də verməməliyik" deyib.
Radikal sağçı və nifrət dolu çıxışları ilə gündəmdə olan Reconquete Partiyasının lideri Erik Zemmur isə seçicilərini ikinci turda Le Penə səs verməyə çağırıb. Millət vəkili Nikolas Dupont-Aignan da seçiciləri Le Penə səs verməyə çağırıb.
Tahir TAĞIYEV
