Rusiya Müdafiə Nazirliyi Ukraynadakı bioloji laboratoriyaların ABŞ prezidenti Co Baydenin oğlu Hunter Baydenə məxsus bir fond tərəfindən maliyyələşdirildiyini iddia edib.
ABŞ-ın Ukraynadakı hərbi bioloji proqramı ilə bağlı açıqlamalar verən Rusiya hərbi qüvvələrinin radiasiya, kimyəvi və bioloji müdafiə qüvvələrinin komandanı İqor Kirillov bildirib ki, Ukraynanın 14 yaşayış məntəqəsində ABŞ-a aid 30 bioloji laboratoriya var və onlar Pentaqonun nəzarətindədir. Kirillov bu laboratoriyalarda bioloji silah üçün istifadə edilə bilən patogenlərin istehsal edilərək Gürcüstan, İngiltərə və Almaniyaya göndərildiyini iddia edib.
Kirillov sözügedən layihələrdə Ukrayna əsgərlərindən istifadə edildiyini bildirib: "Bu, təkcə Ukraynanın deyil, patogen nümunələrinin göndərildiyi bölgələrin də bioloji təhlükəsizliyini təhdid edir. Patogenlərin Ukraynadan Avropa ölkələrinə göndərilməsi insanların ölümünə və epidemioloji vəziyyətin pisləşməsinə səbəb ola bilər”.
ABŞ-da bu cür araşdırmaların qadağan edildiyinə diqqət çəkən Kirillov, ABŞ rəsmilərinin bu məsələ ilə bağlı açıqlama verməli olduğunu deyib.
Ukraynadakı bioloji laboratoriyaların ABŞ prezidenti Co Baydenin oğlu Hunter Bayden tərəfindən maliyyələşdirildiyini iddia edən Kirillov deyib: "Maraqlıdır ki, sözügedən işlərin ABŞ-ın hazırkı administrasiyasına yaxın olan Hunter Baydenin rəhbərliyi altında “Rosemont Seneca” investisiya fondu tərəfindən maliyyələşdirilir. Fondun maliyyə resursları 2 milyard 400 milyon dollardır. Eyni zamanda, bu fondun “Black and Veach” və “Metabiota” şirkətləri də daxil olmaqla Pentaqonun bioloji laboratoriyaları üçün ən böyük avadanlıq təchizatçıları ilə əlaqələri var".
Kirillov bildirib ki, proqramın böyüklüyü diqqət çəkir: “Hərbi departamentdən əlavə, ABŞ Beynəlxalq İnkişaf Agentliyi, Corc Soros Fondu və Xəstəliklərə Nəzarət və Qarşısının Alınması Mərkəzi proqramda birbaşa iştirak edir. Bütün bu fəaliyyətlər Pentaqonun tam nəzarəti altında həyata keçirilir”.
Kirillov iddia edir ki, hərbi bioloji fəaliyyətlərin maliyyələşdirənlər ABŞ və müttəfiqlərinin Ukraynadan ən azı 16 min bioloji nümunə ixrac etməsinə razılıq verib. Lvov, Kiyev, Odessa və Xarkovdan UP-8 layihəsinə uyğun olaraq 4000 hərbi qulluqçudan hantavirusa, 400 hərbi qulluqçudan isə Krım-Konqo qızdırma virusuna qarşı anticisimlər üçün qan nümunələri götürülüb.
Bu nümunələrin Ukraynadakı laboratoriyalardan çıxarıldığını bildirən Kirillov deyib ki, 10 mindən çox nümunə Gürcüstandakı Lugar Center-ə göndərilib: “Alıcılar arasında Böyük Britaniyadakı laboratoriyalar və Almaniyadakı Löffler İnstitutu da var”.
Kirillovun sözlərinə görə, nümunələr Ukrayna və Gürcüstan əraziləri də daxil olmaqla dərmanlarını sınaqdan keçirən Pentaqona bağlı əczaçılıq şirkəti “Gilead”ın maraqları üçün istifadə edilib.
Kirillov iddia edib ki, 2018-2020-ci illərdə Ukraynada laboratoriyalara 32 milyon dollar sərmayə qoyulub.
Tahir TAĞIYEV
