Ukraynada müharibənin başlanmasına görə, Rusiyaya qarşı Qərb ölkələri tərəfindən tətbiq edilən sanksiyaların əhatə dairəsi getdikcə genişlənir. Indi də Britaniya və ABŞ Rusiyanın qızıl bazarında satışının qarşısını almaq üçün hərəkətə keçib.
Təxminən 300 milyard dollarlıq beynəlxalq ehtiyatlarına çıxışı dondurulan Rusiya üçün ehtiyatlarının üçdə birini təşkil edən qızıl və yuan ehtiyatlarından istifadə də çətinləşir.
Bildirilir ki, qlobal iqtisadiyyatdan təcrid olunmuş Rusiya sanksiyalar səbəbindən 140 milyard dollarlıq qızıl ehtiyatına alıcı tapa bilmir. Qeyd edilir ki, Rusiyanın nəhəng qızıl ehtiyatları Putinin ölkə iqtisadiyyatının pisləşməsinin qarşısını almaq üçün istifadə edə biləcəyi azsaylı variantlardan biridir.
London Külçə Bazarı Assosiasiyası Rusiya qızılının hər il trilyonlarla dollar dəyərində qiymətli metalların satıldığı London bazarına girişinə qadağa qoyub.
Böyük Britaniyanın ardından ABŞ-da respublikaçılar və demokratlardan ibarət bir qrup senator ABŞ vətəndaşlarının Rusiya qızılı ilə hər hansı əməliyyatlar aparmasını qadağan edən yeni qanun layihəsi hazırlayıb.
Rusiyanın qızıl satmasının qarşısını alan qanun layihəsini təqdim edən senatorlardan Anqus Kinq, Rusiyanın "böyük qızıl tədarükü"nün Rusiya prezidenti Vladimir Putinin ölkə iqtisadiyyatının daha da pisləşməsinin qarşısını almaq üçün istifadə edə biləcəyi azsaylı variantlardan biri olduğunu deyib.
Bu ehtiyatlara sanksiya tətbiq etməklə Rusiyanın dünya iqtisadiyyatından daha da təcrid oluna biləcəyini vurğulayan Kinq deyib ki, bununla Putinin getdikcə daha çox xərc tələb edən hərbi əməliyyatlarını çətinləşdirə bilərik.
Rusiya 140 milyard dollar dəyərində 2300 ton qızılla dünyanın 5-ci ən böyük qızıl ehtiyatına malik ölkədir. Son 15 ildə toplanan qızıl ehtiyatlarının Rusiya üçün bir növ “iqtisadi sığorta” məqsədi daşıdığı bildirilir.
Ukraynada davam edən müharibə və Qərb ölkələrinin sanksiyaları ilə Rusiya rulu dəyər itirərək rekord həddə aşağı düşüb, ölkədə qızıla tələbat yüksək həddə çatıb.
TAHİR
