Qərblə Rusiya arasında diplomatik danışıqların iflasa uğraması ilə Rusiyanın hər an Ukraynanın işğalına başlayacağı təhlükəsi artıb.
ABŞ-ın milli təhlükəsizlik üzrə müşaviri Sallivanın Rusiyanın Pekin Qış Olimpiya Oyunları bitməmişdən əvvəl Ukraynaya müdaxiləyə başlaya biləcəyi ilə bağlı iddiasının ardından Qərb mediası Rusiyanın müdaxiləsinin hər an başlaya biləcəyini yazır.
“Bloomberg” Rusiyanın işğala fevralın 15-də başlayacağını iddia edib. İşğal tarixini heç bir mənbəyə əsaslandırmayan “Bloomberg”in ardından Alman “Der Spiegel” dərgisi də işğalın fevralın 16-da başlayacağını yazıb. Dərgi ölkənin kəşfiyyat rəsmilərinə istinadən Rusiyanın fevralın 16-da Ukraynanı işğal etməyə başlayacağını iddia edib.
İsrailin “Haaretz” qəzeti də yazır ki, ABŞ İsrail administrasiyasını Rusiyanın Ukraynaya təcavüzünün çərşənbə axşamı və ya çərşənbə günü başlaya biləcəyinə dair xəbərdarlıq edib, Təl-Əvivin isə vətəndaşlarının təxliyəsi üçün tədbirləri sürətləndirib.
Qəzet Vaşinqtonun Rusiyanın ən tez çərşənbə axşamı Ukraynaya təcavüz edə biləcəyi barədə məlumatı İsraillə paylaşdığını bildirib. Bundan sonra İsrail aviaşirkətlərinin minlərlə israillini təxliyə etmək üçün hərəkətə keçdiyi bildirilir.
“Yedioth Ahranoth” qəzeti isə Vaşinqtondan aldığı bildirişlərə görə, İsrailin Ukraynadan vətəndaşlarını təxliyə etmək üçün çərşənbə gününə qədər vaxtı olduğunu açıqlayıb.
Bildirilib ki, İsrailin baş naziri Naftali Bennet müvafiq qurumlardan ən qısa zamanda çox sayda israillinin Ukraynadan çıxarılmasını istəyib.
Ukraynada 15 minə yaxın İsrail vətəndaşının olduğu, onlardan 4500 nəfərinin internetdə təxliyə məlumat formasını doldurduğu bildirilir.
Qeyd edək ki, Ağ Evin Milli Təhlükəsizlik üzrə müşaviri Sullivan iki gün əvvəl Rusiyanın Ukraynanı işğal etmək üçün kifayət qədər güc topladığını, ölkənin böyük bis hissəsini əhatə edəcək bir işğal əməliyyatına "hər an başlaya biləcəyini" deyib.
O, Rusiyanın hücuma havadan bombardman və ya raket hücumu ilə başlayacağı ehtimalı olduğunu deyib: “ABŞ kəşfiyyatı onlarda olan məlumatlara əsasən hesab edir ki, Rusiya prezidenti Vladimir Putin Pekində Qış Olimpiya Oyunları bitməmiş, yəni fevralın 20-dən əvvəl işğala başlaya bilər. Ukraynanın paytaxtı Kiyevə sürətli bir hücum da mümkündür".
Tahir TAĞIYEV
