Son zamanlar Rusiya ilə Ukrayna arasında gərginliyin artdığı bir vaxtda ABŞ prezidenti Co Bayden ABŞ hərbçilərinin Şərqi Avropada yerləşdirilməsinə rəsmən razılıq verib.
ABŞ Müdafiə Nazirliyinin (Pentaqon) verdiyi açıqlamada Şərqi Avropaya 3000 - Rumıniyaya min, Polşa və Almaniyaya isə 2 min hərbçi göndəriləcəyi billdirilir.
Şimali Karolinadakı Fort Braggdakı 18-ci və 82-ci Hava Desant Diviziyalarından Almaniya və Polşaya 2 min əsgər göndəriləcəyini deyən Pentaqonun sözçüsü Con Kirbi, Rumıniyaya göndəriləcək min əsgərlə bu ölkədəki ABŞ əsgərlərinin sayının 1900-ə çatacağını bildirib. O, bəyan edib ki, Avropaya göndəriləcək qoşunlar müvəqqəti xidmətdə olacaq və Ukraynada mümkün müharibədə iştirak etməyəcəklər.
Kirbi bildirib ki, məqsəd Rusiyanın Ukrayna sərhədlərində 100 minə yaxın əsgər yerləşdirməsilə gərginliyin artdığı bir vaxtda müttəfiqlərin təhlükəsizliyini təmin etməkdir. ABŞ-ın gərginliyi azaltmaq üçün israr etməsinə baxmayaraq, Rusiyanın Ukrayna sərhədinə hərbi qüvvə yığmasının son 24 saatda belə davam etdiyini qeyd edən Kirbi, “Hörmətli Putinə və dünyaya qarşıdurma ilə bağlı güclü siqnal göndərməyimiz vacibdir” deyib. Kirbi Fransanın da NATO komandanlığı altında Rumıniyaya əlavə qüvvələr göndərmək qərarı verdiyini xatırladıb və NATO-ya üzv digər Avropa ölkələrinin də NATO-nun şərq cinahına əsgər göndərməyi düşündüyünü qeyd edib.
Kirbi, göndəriləcək qüvvələrin daha əvvəl NATO Çevik Qüvvələrinə göndərilmək üçün hazır vəziyyətə gətirilən 8500 əsgərdən ayrı olduğunu da sözlərinə əlavə edib.
Qoşunların yaxın günlərdə bölgəyə göndəriləcəyi gözlənilir.
ABŞ-ın Almaniya, Polşa və Rumıniyaya 3 min əsgər göndərmə qərarının bölgədə gərginliyi artması risqinə gəlinsə Ağ Evin sözçüsü Cen Psaki deyib ki, bölgədə təcavüzkar bir ölkə var, bu da Rusiyadır.
Rusiyanın hələ də hər an Ukraynaya hücum edə biləcəyinə diqqət çəkən Psaki deyib ki, Putin bölgədəki gərginliyi artırarsa, göndərəcəyimiz əsgər sayına yenidən baxa bilərik.
TAHİR
