Yanacağın bahalaşması ilə başlayan və sonra zorakılığa çevrilən etirazları yatırmağa çalışdığı Qazaxıstanda Milli Təhlükəsizlik Komitəsinin keçmiş sədri Kərim Məsimov dövlətə xəyanət ittihamı ilə saxlanıb.
Baki-xeber.com Sputnik agentliyinin Qazaxıstan xidmətinə istinadən xəbər verir ki, vəzifədən kənarlaşdırıldıqdan iki gün sonra həbs edilən Məsimov təqsirli bilinərsə, 15 ilə qədər həbs cəzası ala bilər.
Məsimovla yanaşı digər şəxslərin də eyni ittihamla saxlandığı bildirilir, lakin həmin şəxslərin kimliyi ilə bağlı heç bir açıqlama verilmir.
Bundan əvvəl Qazaxıstanın ilk prezidenti Nursultan Nazarbayevin keçmiş müşaviri Yermuxamet Yertısbayev bildirmişdi ki, ölkədə böhranın səbəblərindən biri də bəzi yüksək vəzifəli məmurların, eləcə də hüquq müdafiəçilərinin xəyanəti olub. O, baş verənləri dövlət çevrilişinə və silahlı qiyama cəhd adlandırıb, əlavə edib ki, hadisələrin miqyası onun göstəricisidir ki, "hakimiyyətin yüksək eşelonundakıların, eləcə də hüquq-mühafizə orqanlarındakıların xəyanəti olmadan bunu etmək olmazdı".
TAHİR
