Britaniyanın “The Guardian” qəzeti 2018-ci ildə İstanbulda səudiyyəli jurnalist və “Washington Post” qəzetinin yazarı Camal Qaşıqçının öldürən komandanın üzvü olmaqda təqsirli bilinən 3 nəfərin Səudiyyə Ərəbistanının paytaxtı Ər-Riyadda dövlət məmurlarının işlətdiyi dəbdəbəli villalarda yaşadığını ortaya çıxarıb.
Bali-xeber.com xəbər verir ki, Səudiyyə kəşfiyyatına bağlı mənbə qəzetə bildirib ki, qatillər həbs cəzalarını dövlətə məxsus dəbdəbəli villa və binalarda çəkirlər. Ailə üzvləri tez-tez qatilləri sərbəst şəkildə ziyarət edə, məhbuslar iş otaqlarından və idman zallarından istifadə edə bilirlər. Mənbə iddia edib ki, məhəllə sakinlərindən biri İstanbuldakı konsulluqda Qaşıqçının cəsədini parçalara ayıran məhkəmə-tibb eksperti Salah əl-Tubaiqidir. Bildirilib ki, Qaşıqçının konsulluqdan sağ çıxdığı qənaətini yaratmaq üçün İstanbula gələn Mustafa əl-Madani və əməliyyata rəhbərlik edən Mənsur Əbahüseyn də burada qalır.
2019-cu ilin dekabrında Səudiyyə Ərəbistanında gizli şəkildə aparılan və beynəlxalq ictimai rəydə “saxta” kimi qələmə verilən məhkəmə prosesində bu adamların hər üçü bəraət alıb. Lakin onların taleyi barədə heç bir məlumat verilmirdi. Səudiyyə rəhbərliyi bu şəxslərin ciddi şəkildə cəzalandırıldığını iddia edirdi.
Qəzetin başqa bir iddiasına görə, ötən həftələrdə Türkiyənin tələbi ilə Fransada saxlanan və Qaşıqçı cinayətində şübhəli olduğu bildirilən Halid Alotaibi sonradan sərbəst buraxılıb.
Qəzetin yazdığına görə, Alotaibinin axtarılan şəxs olduğu, lakin Ər-Riyadın təşəbbüsü ilə sərbəst buraxıldığı iddia edilib. Qəzet Səudiyyə Ərəbistanının vəliəhd şahzadəsi Məhəmməd bin Salmanın bunun mühüm məlumatların üzə çıxmasına səbəb olacağına inandığı üçün saxlanan şəxsin Türkiyəyə göndərilməsini istəmədiyini iddia edib.
