İsrailin Baş naziri Naftali Bennet Türkiyə Prezidenti Rəcəb Tayyib Ərdoğanla telefonla danışıb. Baki-xeber.com xəbər verir ki, bu İsrail baş naziri ilə 2013-cü ildən sonra ilk telefon danışığıdır.
Bennet görə İstanbulda Türkiyə Prezidentinin iqamətgahını çəkdiyinə həbs edilən israillilər Natali və Mordi Okninin azad edilməsində göstərdiyi səylərə görə Ərdoğana təşəkkür edib.
Bundan başqa Ərdoğanla və İsrail Prezidenti İshaq Hersoq arasında da telefon danışığı baş tutub. Telefon danışığı zamanı iki ölkə lideri ikitərəfli münasibətləri və regiondakı vəziyyəti müzakirə ediblər.
T.Ərdoğan israilli həmkarı ilə söhbətində Türkiyə ilə İsrail arasındakı əlaqələrin Yaxın Şərqdə təhlükəsizlik və sabitlik üçün əhəmiyyətli olduğunu vurğulayıb.
Türkiyə Prezidenti bildirib ki, həm ikitərəfli, həm də regional məsələlərdə qarşılıqlı anlaşma əldə olunarsa, iki ölkə arasında fikir ayrılıqları minimuma endirilə bilər.
T. Ərdoğan regionda sülh, tolerantlıq və birgəyaşayış mədəniyyətinin bərpasının vacibliyini vurğulayıb və bu baxımdan Fələstin-İsrail əlaqələrinin inkişafının və tərəflər arasında sülh prosesinin bərpasının vacib olduğunu bildirib.
Onun sözlərinə görə, Türkiyə ilə İsrail arasında təmasların və dialoqun davam etdirilməsi hər iki ölkənin maraqlarına cavab verir.
