Dövlət İmtahan Mərkəzinin (DİM) sədri Məleykə Abbaszadə keçirdiyi son brifinqdə təhsil ekspertlərini tənqid edib və onların fikirləri ilə ictimai rəyin formalaşmadığını deyib.
DİM sədri vurğulayıb ki, ictimai rəyin əsası real təhsil ictimaiyyəti tərəfindən formalaşdırılır: “İctimai fikir deyəndə, mən ilk növbədə ali məktəb müəllimlərini, orta ixtisas və orta məktəb müəllimlərini nəzərdə tuturam. Onlar real vəziyyəti görür və qiymətləndirirlər”.
M.Abbaszadənin ictimai rəyi orta və ali təhsil müəssisələrində, o cümlədən, orta ixtisas təhsilində təmsil olunan müəllimlərin yaratdığı fikrini irəli sürməsi birmənalı qarşılanmır.
Ümumiyyətlə, bu nə deməkdi? Bəs ölkədə siyasi partiyalar, vətəndaş cəmiyyəti institutları, mətbuat, jurnalist harda qalıb ki, müəllim ictimai rəy yaratsın? Əslində, ictimai rəyi siyasi partiyalar, mətbuat, QHT-lər və sair yaradır. Müəllim ictimai rəyi harda yaradır? Müəllimim funksiyası tamam başqa şeydi, o dərs deyir, bilik verir və sair.
DİM sədri niyə belə ifadə işlədib?
Faiq Balabəyli: “Mətbuatın, QHT-lərin, dərnəklərin, ictimai zəmində olan instiututların və digərlərinin əhali arasında daha çox olması onu göstərir ki, ictimai fikrə ən çox onlar təsir edir”
Müstəqil.az saytının rəhbəri, AYB üzvü, şair Faiq Balabəyli “Bakı-Xəbər”ə bildirdi ki, cəmiyyətdə ictimai fikrin formalaşmasında müəllimlərin rolu azdır: “Görünür, Məleykə xanımın peşəsindən, daha doğrusu məşğul olduğu sahədən kənarda olanların varlığı, məşğuliyyəti və cəmiyyətdəki mövqe və nüfüzu, təsir dairəsi ilə tanışlığı yoxdur. İctimai rəyin formalaşmasında hər kəsin mövqeyi və mülahizəsi önəmli ola bilər. Düzdür, müəllimlərin də tələbə və şagirdlərlə etdiyi hər hansı bir söhbətin də rolu var, lakin bu çox dar bir çərçivəni əhatə edər. Ölkədə kifayət qədər QHT var və müxtəlif sahələri əhatə edirlər, görüşlər keçirir, tədbirlər planlayır, təkliflər verir və sosial, eləcə da digər sahələrdə işlər görurlər. Eləcə da siyasi partiyalar, dərnəklər və sair”.
O qeyd etdi ki, müəllimlərin ictimai fikrin formalaşmasında rolu azdır və bu ölkənin ayrı-ayrı strukturunda öz əksini tam olaraq tapa bilməz: “Mətbuatın, QHT-lərin, dərnəklərin, ictimai zəmində olan instiututların və digərlərinin əhali arasında daha çox olması onu göstərir ki, ictimai fikrə ən çox onlar təsir edir. İstənilən ölkədə istənilən sahə haqqında fikir mübadiləsi aparılması əslində ictimai rəyin formalaşmasında ən mühüm rol oynayır”.
Məhərrəm Zülfüqarlı: “Elm və təhsil sahəsində ictimai rəyi birbaşa bu sahə ilə məşğul olan şəxslər yaradır”
Tarix elmləri doktoru, professor Məhərrəm Zülfüqarlı isə “Bakı-Xəbər”ə bildirdi ki, M.Abbaszadənin fikrində həqiqət var: “Məleykə xanım təhsil sahəsində peşəkardır və bilir ki, orta məktəbdə, kollecdə, ali məktəbdə dərs deyən müəllimlər gündəlik şagirdlərlə, tələblərlə işləyirlər. Müəlliflərin ictimai rəyi formalaşdırması fikri doğrudur. Çünki onlar cəmiyyətlə birbaşa təmasdadırlar. Eyni zamanda elm sahəsi də belədir. Elmin problemlərini elmlə məşğul olan insanlar daha yaxşı bilir. Onlar ictimai rəyi yaxşı bilirlər və ona görə də öz fikirlərini deyirlər.
Amma çox təəssüf ki, son illər elm və təhsil sahəsinə rəhbərlik edənlərin bir çoxu bu sahənin adamı olmayıb, nə bir saat dərs deyiblər, nə elmlə məşğul olublar. Böyük staja malik müəllimlərdən imtahan götürməklə məşğul olurlar. Bu acınacaqlı bir haldır. Mənə elə gəlir ki, hər bir işi mütəxəssisə həvalə etmək lazımdır . Yəni burda proteksiya yolu ilə vəzifəyə gətirmək, yaxud uyğun olmayan insanları elm və təhsil sahəsinə rəhbər qoymaq bilavasitə bu işə mane olur, problemləri daha da dərinləşdirir”.
M.Zülfüqarlı qeyd edir ki, elm və təhsil sahəsində ictimai rəyi birbaşa bu sahə ilə məşğul olan şəxslər yaradır. O hesab edir ki, müəlimlərin və alimlərin yanaşması ilə problemləri həll etmək olar.
İradə SARIYEVA
