Son zamanlar vəzifə səlahiyyətlərindən sui-istifadə edən məktəb direktorlarının cəzalandırılması faktları artmaqdadır. Əmək fəaliyyətində yol verdikləri nöqsanlara görə Bakı şəhəri 275 nömrəli tam orta məktəbin direktoru Elnur Hüseynova və 278 nömrəli tam orta məktəbin direktoru Sevinc Hüseynovaya Azərbaycan Respublikasının Əmək Məcəlləsinin 186-cı maddəsinin 2-ci hissəsinin “b” bəndinə əsasən sonuncu xəbərdarlıqla şiddətli töhmət verilib.
Qeyd edək ki, son zamanlar məktəb direktorları ilə bağlı nəzarət tədbirləri artıb. Fəaliyyətində qüsur aşkar olunan məktəb direktorları ya işdən çıxarılır, ya da şiddətli töhmət alır.
Elşən Qafarov: “Birillik əmək müqaviləsi bağlanmış direktor məktəbdə lazım olan mühiti yarada bilmir”
Təhsil eksperti Elşən Qafarov “Bakı-Xəbər”ə şərhində bildirdi ki, bu kimi hadisələrin baş verməsinə səbəb təhsil müəssisələrində direktorların düzgün seçilməməsidir: “Azərbaycanda 4252 dövlət məktəbi, 34 özəl məktəb var. Bir neçə ildir ki, məktəb direktorları ilə müddətli əmək müqaviləsi bağlanılır. Buna görə də məktəb direktorları daim vəzifələrini itirmək qorxusu ilə yaşayırlar. Məktəbdə mədəni təhsil mühitinin yaradılması onlar üçün önəmli deyil. Məlumdur ki, hazırda məktəblərin əksəriyyətində yeni təyin olunmuş direktorlardır. Yeni təyin olunan direktorların arasında bacarıqlıları da var, amma çox təəssüflər olsun ki, təhsil cameəsində sinfi idarə edə bilməyənlər, necə olursa, məktəb direktoru olurlar. Onu da deyim ki, birillik əmək müqaviləsi bağlanmış direktor məktəbdə lazım olan mühiti yarada bilmir. Məktəblər telefon zəngləri, səs yazıları, çatlar vasitəsilə idarə olunur. Əslində çox faciəvi bir vəziyyətdir”.
Elmin Nuri: “Töhmət verilən direktorlarla bağlı qərarların arxasında hansı səbəbin olduğunu heç kim tam bilmir”
Təhsil eksperti Elmin Nuri “Bakı-Xəbər”ə açıqlamasında qeyd etdi ki, töhmət verilən direktorlarla bağlı qərarların arxasında hansı səbəbin olduğunu heç kim tam bilmir: “Barələrində qərar verilən direktorlar, sadəcə, neqativləri daha tez aşkarlanan şəxslərdir. Onların həmkarları arasında da eyni aqibəti yaşaya biləcək şəxslər az deyil. Amma yaxşı olar ki, məktəb rəhbərliyi ilə bağlı zəruri addımları yalnız sosial şəbəkələrdə yayılan, təhsil gündəminə çevrilən arzuolunmaz hadisə və faktlardan sonra yox, daxili nəzarətin, aparılan monitorinq yoxlamalarının nəticələrindən sonra görək. İctimai nəzarətin İT imkanları hesabına getdikcə artması məsələlərin tam xeyrinədir. Yetər ki, ictimai qınaq, ictimai nəzarət subyektiv yox, obyektiv xarakter daşısın. Bütün bunlar həm də hazırda məktəb direktoru işləyən bəzi şəxslər üçün lazımı işarə, mənəvi xəbərdarlıq rolunu oynadığından, faydalı tərəfləri də böyükdür”.
Günel CƏLİLOVA
