Azərbaycan ailəsi tarixən öz monolitliyi, möhkəmliyi ilə seçilib. Əsrlərdən bəri formalaşan ailə dəyərlərimiz bizim milli-mənəvi sərvətimizdir. Müasir Azərbaycanda ailə institutunun qorunması, müdafiəsi, mühafizəsi dövlətin əsas hədəflərindəndir.
Ailə dəyərlərinin qorunması, gender bərabərliyinin təmin edilməsi istiqamətində dövlət tərəfindən bir sıra sənədlər, dövlət proqramları qəbul edilib. Azərbaycan ictimaiyyəti də var gücü ilə ailə dəyərlərimizi qorumağa çalışır. Ailə institutumuzun ənənəvi model üzərində inkişafı arzuediləndir.
Ekspertlər hesab edirlər ki, ailə insan şəxsiyyətini mədəniyyətə qovuşduran, uşağa insan davranışının normalarını, qaydalarını mənimsədən, sosiallaşmasını təmin edən ilk məktəbdir. Sağlam cəmiyyətdə ilk növbədə bütün bəşəri xüsusiyyətləri, dəyərləri mədəni və estetik kriteriyaları özündə cəmləşdirən sağlam ailə modeli olmalıdır. Bu fikri də mütəxəssislər irəli sürür.
Azərbaycan cəmiyyətində demoqrafik inkişafa xüsusi əhəmiyyət verilməsi əsas hədəflərdən biri kimi diqqət mərkəzinə gətirilir.
Azərbaycan dövləti və cəmiyyəti ailə dəyərlərimizin qorunması uğrunda fəaliyyətlərini genişləndirir. Əlbəttə, gender bərabərliyinin təmin edilməsi məsələsinə də ciddi önəm verilir.
Azərbaycan ailəsini hədəfə alan təhlükəli xarici qüvvələr...
Amma təəssüf ki, bəzi xarici dairələr, guya Azərbaycanda "gender bərabərliyinin təmin edilmədiyini" iddia edərək, ölkəmizə qarşı çirkin kampaniyalar aparırlar. Gizlin deyil ki, bu gün ailə dəyərlərimizə qarşı xaricdən ciddi təhlükələr mövcuddur. Bir çox xarici institutlar, beyin mərkəzləri, təşkilatlar var ki, 30 ildən çoxdur bizim ailə modelimizi zədələməyə yönəlik davranışlar sərgiləyirlər. Xaricdəki məlum institutlar ölkəmizdəki bəzi emssarlarının dəstəyi ilə daim ailə dəyərlərimizi, ailə modelimizi hədəfə alıb dəyişdirməyə çalışırlar. Onlar yalandan iddia edirlər ki, guya Azərbaycan ailəsində gender bərabərliyi qorunmur, ənənəvi ailə dəyərləri gənc ailələrin qurulmasına mane olur və sair. Sözsüz ki, bu cür qüvvələrə qarşı cəmiyyət olaraq daim müqavimət göstəririk. Buna baxmayaraq, onlar müxtəlif vasitələrlə öz çirkin məqsədlərini həyata keçirməyə çalışırlar.
"...Bu iş planlıdır və xüsusi məqsədlər güdür"
Sağlam Cəmiyyət Hərəkatının eksperti Lalə Mehralı "Bakı-Xəbər"ə şərhində "Gender cəmiyyətin qadınlara verdiyi vəzifə və öhdəliklə, qadınların cəmiyyətdə necə göründüyü, qəbul edildiyi ilə əlaqədar bir anlayışdır. Genderlə bağlı araşdırmaların əksəriyyəti qadınları kişilərlə müqayisə etmək üçün aparılmır, qadınları əzilən, ikinci sinif insan kimi göstərmək məqsədi ilə aparılır. Yəni bu iş planlıdır və xüsusi məqsədlər güdür"-deyə bildirdi.
"Bunlar gender balansının pozulması demək deyil"
L.Mehralının sözlərinə görə, bəzi məqamlarda ailələrdə ayrıseçkilik müşahidə edilsə də, bəzi xarici institutların iddia etdiyi və təbliğatını apardığı qədər dəhşətli deyil. "Biz inkar edə bilmərik, qadınlar bəzən xor görülür, əzilir, istismar edilir, hələ də adət-ənənə, namus kimi uydurma səbəblərdən oxuya bilməyən qızlar var, çox erkən yaşda ərə verilən qız uşaqları var. Qadınlar var ki, sadəcə öldürülmür, ağır işgəncələrlə və vəhşicəsinə yollarla qətl edilir. Bütün dinlərin, inancların, qədim adət-ənənələrin baş tacı etdiyi qadın bu dövrdə, bu əsrdə yerlərdə sürüklənir, kəndirdən asılır, dəlik-deşik edilir.
Amma bütün bu olanların fonunda, alt qatında, arxa planında başqa planlar da həyata keçirilir. Ailəsində kiçik bir problem olan qadına çıxış imkanı tapırlar, onu ələ alırlar, əgər boşansa problemlərinin həll olunacağını, hər cür maddi dəstək göstəriləcəyini deyirlər. Yəni konkret təhrik edirlər ki, ailəsini dağıtsın. Efirlərdə boşanmış qadınların uğurundan danışırlar, sosial layihə adı altında yayımlanan verilişlərdə ailə dəyərlərini tapdalayırlar. Kəndlərdə qız-qadın qoymadılar, hamısını işıqlı, firavan həyat vədi ilə aldadıb, ailəsindən boşadıb paytaxta çağırırlar.
Normal çərçivələr hər cəmiyyətdə var, bunlar əxlaqi, mənəvi, dini ola bilər, amma hamısı cəmiyyətin sipəridir. Bunlar gender balansının pozulması demək deyil, cəmiyyətin mühafizəsidir. O çərçivələr olmasa deqradasiya daha sürətlə gedər"-deyə L.Mehralı qeyd etdi.
Ekspertin fikrincə, bəzi xarici və daxili qüvvələr çalışırlar ki, baş verən ən kiçik məişət hadisəsini belə, böyük faciə kimi qələmə versinlər.
Azərbaycanda ailə dəyərlərinin müdafiəsinin vacib olduğunu vurğulayan ekspertin sözlərinə görə, biz ailə dəyərlərimizi nə qədər qorusaq, mühafizə etsək bir o qədər mənəvi cəhətdən güclü olarıq.
Bəli, ekspertin də vurğuladığı kimi, biz dəyərlərimizi qorumalı, ənənəvi ailə modelimizə sahib çıxmalıyıq. Eyni zamanda qızların təhsilə cəlb edilməsi, erkən nikahların qarısının alınması kimi işlərdə də aktiv olmalıyıq. Bu gün elə bölgələrimiz var ki, qızlar məktəbdən yayındırılır. Təbii ki, bu amildən də həmin xarici qüvvələr bizə qarşı istifadə etməyə çalışırlar. Lakin dövlətin bu kimi neqativlərə qarşı ciddi mübarizə apardığı məlumdur. Heç şübhəsiz ki, biz də cəmiyyət olaraq, media olaraq dövlətin bu yöndəki addımlarına dəstək olmalıyıq.
Çünki ailə dəyərlərimizi qorumaq üçün bizim cəmiyyətə savadlı, bilikli, öz hüquqlarını, haqqlarını bilən analar, xanımlar gərəkdir. Bizim ailə dəyərlərimizi dağıtmağa çalışanlara qarşı ən böyük silahımız savadlı, bilikli analar və onların yetişdirdiyi övladlar, qoruyub, keşiyini çəkdiyi sağlam ailələrdir. Azərbaycan cəmiyyəti öz ailə modelini qorumaq üçün sona qədər düşmənlərə qarşı mübarizəsini davam etdirməkdə israrlıdır.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
