Nizami Hüseynov: "Sertifikasiya vacib və zəruridir, çalışanların bilik və bacarıqlarını yoxlamaq, öyrənmək üçün çox aktual bir məsələdir"
Məlum olduğu kimi, 2024-cü ildə Azərbaycanın orta ümumtəhsil məktəblərində çalışan 31 min müəllim sertfikatlaşdırma prosesinə cəlb olunacaq.
Gələn ildən isə həm də tərbiyəçi-müəllimlərin sertifikatlaşdırılmasına başlanacaq. Tərbiyəçi-müəllimlərin sertifikatlaşdırılmasında onların hansı bacarıqları yoxlanılmalıdır?
"Hazırda istər işləyən, istər gələcəkdə uşaq bağçalarında işləyəcək müəllimlərin mütləq şəkildə sertifikasiyada və yaxud da qəbulda psixoloji durumları ölçülməlidir"
Təhsil eksperti Nizami Hüseynov "Bakı-Xəbər"ə açıqlamasında qeyd etdi ki, bağçalarda kifayət qədər ciddi problemlər var: "Bu problemlərin əsasında da müəllimlərin ixtisası üzrə işləməməsi durur. Diqqət etsək görərik ki, bağçalarda işləyən müəllimlərin bir çoxunun ixtisası tamamilə fərqlidir, hətta bəlkə də heç pedaqoji sahədə deyil. Sertifikasiya və ya onların işə qəbulu kimi proseslərin Elm və Təhsil Nazirliyinə verilməsi bu kimi problemləri aradan qaldıracaq. Sertifikasiya vacib və zəruridir. Bu, çalışanların bilik və bacarıqlarını yoxlamaq, öyrənmək üçün çox aktual bir məsələdir. Təəssüf ki, bəzi müəllimlərimiz öz üzərində işləmir, ixtisasını təkmilləşdirmir. Ona görə də onları mütəmadi olaraq sertifikasiyaya cəlb etmək lazımdır. Bizə savadlı müəllimlər lazımdır.
Bağçalarda işləyən müəllimlərin şagirdlərlə davranışı heç də xoş deyil. Uşaq bağçalarında azyaşlılardır və yaşına görə danışmayan, hərəkətlərində bir az daha nadinc uşaqlar da ola bilər. Yəni müəllim bağçada hər cür uşaqla qarşılaşa bilər və ona hazır olmalıdır"
Ekspert qeyd etdi ki, bəzi ölkələrdə bu məsələlər başqa cür həyata keçirilir: "Xarici təcrübəyə baxanda görürük ki, uşaq bağçalarında işləyən müəllimlərin ixtisası, demək olar ki, məhz bu sahədədir. Mütləq şəkildə müəllimləri işə götürərkən onların psixoloji durumlarına da diqqət yetirirlər. Bu psixoloji yoxlamanı da kağız və ya test üzərində etmirlər. Mütləq şəkildə praktiki olaraq yoxlayırlar. Daha sonra müəllim testdən keçsə belə, əgər psixoloji durumu istədikləri səviyyədə deyilsə, o zaman uşaq bağçasında işləməyinə icazə vermirlər. Düşünürəm ki, bizdə də eyni vəziyyət olmalıdır. İstər hazırda işləyən, istər gələcəkdə uşaq bağçalarında işləyəcək müəllimlərin mütləq şəkildə sertifikasiyada və yaxud da qəbulda psixoloji durumları ölçülməlidir".
Günel CƏLİLOVA
