Rauf Ağamirzəyev: "Dövlət bu sahəyə yüksək keyfiyyət parametrləri müəyyən edir"
Azərbaycanda nəqliyyat sahəsində bir sıra problemlər qalmaqdadır. Danılnmaz faktdır ki, Bakı metrosunda yaşanan sıxlıq, günün gur saatlarında intervalın çox olması isə vətəndaşların dəqiqələrlə vaxt itirməsinə səbəb olur.
Analoji problem yerin üstündə hərəkət edən avtobuslarda da müşahidə olunur. Səhər və axşam saatlarında balaca və köhnə avtobuslara minmək üçün insanlar sanki yarışırlar. Qeyd edək ki, şəhərin mərkəzində avtobuslar yeni olsa da, onlar da ləng işləyir, bəzən bir avtobusu intervalda göstəriləndən qat-qat çox gözləməli olursan. Buna tıxacın səbəb olduğu deyilir. Lakin bu məsələdə xəttə buraxılan avtobus sayının azlığı da rol oynayır.
Belə olan halda insanların köməyinə taksilər çatır. Ancaq indi bu nəqliyyat vasitələrinin sayının azaldılması müzakirə olunur. Belə ki, nəqliyyat nazirinin müavini Rəhman Hümmətov Milli Məclisin İqtisadi siyasət, sənaye və sahibkarlıq komitəsinin ötən iclasında deyib ki, Bakıya 20 min taksi kifayət etməlidir. Taksi sayı cüzi dəyişiklərlə yaydan bəri 67 mindən 60 minə azaldılıb: "Bakının adam sayı nəzərə alınmaqla, cəmi 20 min çivarında taksiyə ehtiyacı var. Hazırda bizim avtobus və yük maşınlarında sürücülərə ehtiyacımız var. Bir taksini bəzən iki nəfər də işlədir. Bu səbəbdən taksilərin sayının azaldılması insanların iş yerlərini itirməsi demək deyil".
Ehtimal edilir ki, gələcəkdə taksilərin sayı azalacaq. Görəsən, taksi sayının azaldılması qiymət artımına və keyfiyyətin yüksəlməsinə necə təsir edəcək?
"Taksilərə tələbin bu qədər çox olması ictimai nəqliyyatın yaxşı səviyyədə olmaması ilə bağlıdır"
Nəqliyyat eksperti Rauf Ağamirzəyev "Bakı-Xəbər"ə açıqlamasında bildirdi ki, taksilərə tələbin bu qədər çox olması ictimai nəqliyyatın yaxşı səviyyədə olmaması ilə bağlıdır. Biz ictimai nəqliyyata investisiya yatırmalıyıq ki, insanlar üçün daha cəlbedici olsun. Belə olduqda, təbii olaraq, insanlar ictimai nəqliyyata yönələcək və taksiyə bu qədər ehtiyac qalmayacaq. 1967-ci ildə Bakıda "Baksovet"dən Nərimanova ilk metro xətti açılanda yerin üstündə 102 kilometrlik tramvay, 300 kilometrə yaxın trolleybus və 198 kilometrlik şəhərətrafı elektrik şəbəkəsi var idi. İnsanlar bu növ nəqliyyat vasitələri ilə daha rahat hərəkət edirdi. Amma 20 il bundan öncə biz çeşidli ictimai nəqliyyatı ləğv etdik və kütləvi avtomobilləşmənin fəsadları müşahidə edilməyə başlandı. Dünyanın digər yerlərində bizdən də çox avtomobil var. Sual odur ki, onlar gün ərzində avtomobillə nə qədər məsafə qət edir. Hazırda Bakı şəhərinin "Rəqəmsal əkizi" yaradılıb və səfərlərin nə ilə təşkil olunmasının faizi müəyyən olunub. Hazırda müəyyən faiz taksi ilə təşkil olunursa, bu normal bir şey deyil. Eyni zamanda taksi qiymətlərinin bu cür ucuz olması da normal bir şey deyil. Müxtəlif simulyasiya proqramları ilə fərqli ssenarilərdə hansı dəyişikliyin hansı nəticəyə gətirəcəyini artıq öncədən proqnozlaşdırmaq olar. Artıq bəzi islahatların tətbiq olunması nəzərdə tutulub. Belə olan təqdirdə insanlar müəyyən məsafəni piyada, yoxsa hansısa nəqliyyat vasitəsilə gedəcəyinə özləri qərar verəcək. Bu reallıqda taksiyə də tələb avtomatik olaraq azalacaq".
Həmsöhbətimiz onu da əlavə etdi ki, taksilərə dövlət tərəfindən də tələblər müəyyən olunub. Son illər, xüsusən pandemiya dövründə taksi sayı artdı. Qiymət və keyfiyyət aşağı düşdü. Belə olduqda hər iki tərəfin narazılığı müşahidə olundu. Sürücülər istismar olunduqlarından, sərnişinlər isə xidmət keyfiyyətinin aşağı olmasından şikayət edirdi. Ona görə də dövlət bu sahəyə yüksək keyfiyyət parametrləri müəyyən edir. Digər tərəfdən, qiymətləri bazar tənzimləyir: "Taksi şirkətləri tərəfindən xidmət keyfiyyətinə uyğun olaraq qiymətlər təklif olunur. Minimum hədd müəyyən olunmaqla, təqdim olunan xidmətə görə qiymətlər dəyişir".
Günel CƏLİLOVA
