Sevdalandığı Vətən adlı sevgisinə qovuşan Vüsal...
Lənkəran rayonu, Yuxarı Nüvədi kəndində dünyaya göz açan Vüsal Kazımov 44 günlük haqq savaşımızda canını Vətəninə, millətinə fəda etməklə 29 yaşında şəhidlik zirvəsinə ucalıb. Belə bir müqəddəsliyə qovuşmaq ən böyük şərəf və qürurdur.
Məhz bu səbəbdən Lənkəranın qəhrəman oğlu şəhid baş-leytenant Vüsal Kazımov mənan yaşayır, sevdalandığı Vətən adlı sevgisi ilə bizdən çox-çox ucada durur. Xalq heç vaxt öz oğlunu unutmur, həmişə onu ehtiramla xatırlayır.
Həm də Vüsal mənəvi təmələ, pak niyyət və arzulara tapınmış bir ailədə tərbiyə alıb. Həyat eşqi, Vətənə sevgi, insanların kamil, xoşbəxt yaşaması üçün mehr-məhəbbət ailənin kökündən gəlmədir. Vüsalın anası doğma kənd məktəbində gənc nəslin təlim-tərbiyəsi ilə məşğul olur, atası professor Kamran Kazımov Astara Pedaqoji Kollecin direktordur.
Bu günlər YAP Astara Rayon Təşkilatın sədri Həbib Cəfərov, Astara Pedaqoji Kollecinin kollektivi, Astara şəhər 1 saylı məktəbin direktoru Xədicə Əliyeva qəhrəman şəhidin ata ocağında olublar. Söhbət əsasında bildirilib ki, torpaq qeyrətli oğulların çiynində Vətən olur. Fəqət, Vüsal heç vaxt əzəli yurd yerimiz Qarabağın yağı tapdağına çevrilməsinə dözməzdi. Məqamı gələn adda Azərbaycanımızın harayına səs verib, 30 il əsir düşən Vətən torpaqlarının azadlığı uğrunda son nəfəsinə qədər döyüşüb. Onun qan tökdüyü torpaqlarda indi Azərbaycanın aylı-ulduzlu qələbə bayrağı dalğalanır. Vüsal kimi mərd oğul dünyaya bəxş etdiyiniz üçün sizin qarşınızda baş əyməyin özü belə şərəfdir.
"Kamran müəllimi hələ uşaq vaxtlarımda tanıyıram, olduqca səmimi, təvazökar, Vətənə bağlı bir insandır. Oğlu şəhid Vüsal Kazımovu da Vətənə bağlı, elinə sədaqətli böyüdüb". Bu səmimi fikirləri isə YAP Astara Rayon Təşkilatın sədri Həbib Cəfərov söyləyib.
Daha sonra ziyarətçilər şəhid Vüsalın əbədi baş qoyduğu müqəddəs torpağını ziyarət edib və məzarı üzərinə tər güllər düzüblər.
Məlumat üçün qeyd edək ki, baş-leytenant Vüsal Kazımov Vətən müharibəsində Füzuli əməliyyatında, Cəbrayıl döyüşlərdə, Xocavəndin, Şuşanın azadlığı uğrunda sözün əsl mənasında erməni dığalarına qan qusdurub. Sonuncu dəfə 26 oktyabrda ailəsi ilə əlaqə saxlayıb. Şuşada qızğın döyüşlərin birində düşmən gülləsinə tuş gəlib. Əbədi könüllərə köç edən qəhrəman Vüsal Kazımov dövlət tərəfindən 3-cü dərəcəli "Vətənə xidmətə görə" ordeni, "Vətən uğrunda", "İgidliyə görə" və digər medallarla təltif edilib.
Zəfər ORUCOĞLU,
Azərbaycan Jurnalistlər Birliyinin üzvü
