Son dövrlər müxtəlif növ infeksiyaların, xəstəliklərin sayı artıb. Bu xəstəliklərə, xüsusilə də immuniteti zəif olan uşaqlar yoluxur. Əsasən də bu yoluxma məktəbdə bir-biri ilə yaxın münasibətdə olan şagirdlər arasında daha çox olur.
Bunun üçün də məktəb sadəcə təhsil verməklə kifayətlənməyib, həm də şagirdlərin sağlamlığına cavabdeh olmalıdır. Bu işdə də əsas yük məktəblərdəki tibbi xidmətin üzərinə düşür.
Qeyd edək ki, əvvəllər bütün orta ümumtəhsil məktəblərində tibb məntəqələri fəaliyyət göstərib. Lakin zamanla onların fəaliyyəti dayandırılıb. Bəs məktəblərdə tibb məntəqələrinin olmamasının səbəbi nədir?
Adil Qeybulla: "Orta məktəblərdə tibb məntəqələrinin olmağı olduqca zəruridir"
Professor, tibb üzrə ekspert Adil Qeybulla "Bakı-Xəbər"ə dedi ki, sovet vaxtı məktəblərdəki tibb məntəqələrinə nəzarət olduqca güclü idi. Uşaq yıxıldıqda və ya kəskin travma aldıqda ilkin yardımı göstərmək üçün həmin tibb məntəqələri məsuliyyət daşıyırdı: "Təcili tibbi yardım maşını gələnə qədər oradakı tibb bacısı ilkin tibbi yardımı göstərməlidir. Bəzən həkiməqədərki yardım, hətta həkim yardımını belə əvəz edir. Yəni uşağın həyatı göstərilən ilkin tibbi yardımdan asılı olur. Bu baxımdan, orta məktəblərdə tibb məntəqələrinin olmağı olduqca zəruridir. Dünyanın bir sıra ölkələrində məktəblərdə vəziyyət bir az fərqlidir. Belə ki, onların istifadə etdiyi alətlər daha çoxdur. Süni nəfəs vermək üçün aparat, xəstənin boğulma halları olduqda boğaza salmaq üçün xüsusi formalardan istifadə edilir. Həm də həmin məktəblərdə işləyən tibb bacıları xüsusi təlimlərdən keçirlər. Biz də çalışmalıyıq ki, belə şərait yaradaq".
Elmin Nuri: "Məktəblərdə tibb otaqlarının olması problematik məsələdir"
Təhsil eksperti Elmin Nuri "Bakı-Xəbər"ə açıqlamasında bildirdi ki, məktəblərdə tibb otaqlarının olması problematik məsələdir: "Burada işləyən işçilərindən biz yüksək tibb bacarığı, həkimlik xüsusiyyəti gözləyə bilmərik. Sovet dövründə də tibb otağının və tibb işçisinin funksiyası o olub ki, ilkin ambulator vəziyyət yarananda anında müdaxilə edə bilsin, təcili yardım maşını gələnə, xəstə xəstəxanaya çatdırılana qədər ilk addımı atsın. Bizim məktəblərdə adi uşağın burnundan qan açılanda, hansısa nahiyəsi yaralananda tibb otaqları onlara müdaxiləyə cavab verə bilmir. Əksəriyyətində yalnız xüsusi tələb kimi irəli sürülən "apteçka", onun içində bint, spirt, yod, tənzif kimi elementar ləvazimatlar var. Bunu qoyma səbəbləri də nazirlikdən yoxlama gələndə görsün deyədir. Zənn edilir ki, əgər o varsa, tibb otağı və normal fəaliyyəti də var. Bu belə deyil, iş bununla bitmir. Məktəblərdəki tibb işçisi məktəbin yerləşdiyi ərazidə sahə poliknikasının həkimi tərəfindən müəyyən olunmalıdır. Məktəblərdə orta təhsil müəssisələrində tibb və iaşə xidmətlərinin təşkili qaydası Nazirlər Kabineti tərəfindən müəyyənləşdirilib və bu qaydalara əsasən hər bir məktəbin tabeliyində tibb kabineti olmalıdır. Bu tibb kabineti xüsusi təmizliyə, gigiyenik standartlara cavab verməklə yanaşı, ilkin tibbi yardıma lazım olan əşya və avadanlıqlarla da təchiz olunmalıdır. Tibb işçisi isə həmin məktəbin yerləşdiyi ərazidə sahə poliknikasının tibb işçisi və ya həkim tərəfindən müəyyən olunmalıdır. Bu tibb içisi artıq məktəb direktoruna tabe deyil, həmin ərazidəki poliknikanın baş həkiminə tabedir. Məktəbdəki tibb işçisi müəllim heyəti ilə, valideynlərlə, məktəb rəhbərliyi ilə mütəmadi görüşmək, məktəbdəki tibbi durumla bağlı məlumatlandırmaq hüququna malikdir və bu onun vəzifə borcudur. Ancaq məktəblərdəki tibb məntəqələri nə təhsil, nə də sosial problem baxımından heç kimin yadına düşməyən məsələdir".
Günel CƏLİLOVA
