Ramil Osmanlı: "Tikinti şirkətləri ayrı-ayrı vaxtlarda vətəndaşların hüquqlarını kobud şəkildə pozur"
Azərbaycanda tikinti bumu start götürəndən vətəndaşların aldadılması halları da başlayıb. Son bir neçə ildə isə bəzi tikinti şirkətlərinin vətəndaşları aldatması xüsusilə geniş miqyas alıb. Bu, çox zaman klassik üsulla həyata keçirilir: binanın tikintisi başa çatır və bölgü zamanı məlum olur ki, bir mənzil eyni zamanda 3-4 vətəndaşa satılıb.
Bundan sonra tikinti şirkəti ilə vətəndaşlar arasında məhkəmə çəkişmələri başlayır. Paytaxtda onlarla belə hal yaşandığı üçün vətəndaşda tikinti şirkətinə etibar qalmayıb. İndi vətəndaş, əlində pulu olsa belə, tikinti şirkətlərindən ev almağa tərəddüd edir.
Bu məsələ ötən həftə Milli Məclisdə də müzakirə olunub. Millət vəkilləri tikinti şirkətlərinin özbaşınalığı ilə bağlı fikirlər səsləndiriblər. Qeyd edilib ki, Bakıda tikinti şirkətləri kütləvi olaraq vətəndaşların hüquqlarını pozur. Həmçinin, Azərbaycanda müəyyən tikinti şirkətlərinin icazə almadan söküntü və tikinti işləri apardığı da səsləndirilib.
"Millət vəkilləri şəxsən bilirlər ki, ölkədə tikinti biznesinə kimlər rəhbərlik edir, amma…"
Mövzu ilə bağlı fikir bildirən əmlak eksperti Ramil Osmanlı "Bakı-Xəbər"ə şərhində bildirdi ki, tikinti şirkətlərinin özbaşınalığı ilə bağlı onlara mütəmadi olaraq müraciət daxil olur: "Bu məsələ ilə bağlı millət vəkillərinin belə çarəsiz qaldığı bir durumda bu sahədə fəaliyyət göstərən ekspertlərin prosesə qarşı mübarizə aparmaq imkanı və ya bu mübarizədə hansısa bir irəliləyiş əldə etmək imkanı məhduddur. Həmin millət vəkilləri şəxsən bilirlər ki, ölkədə tikinti biznesinə kimlər rəhbərlik edir və s. Amma məsələ burasındadır ki, bunu heç kim açıq şəkildə ifadə edə bilmir və ya ifadə etməkdən çəkinir. Hətta bununla bağlı ombudsman belə narahatlıq ifadə etdi, ayrı-ayrı şəxslər narahatlıq ifadə edir. Bununla bağlı çoxsaylı məhkəmə mübahisələri var. Eyni zamanda xeyli sayda işi istintaq orqanı araşdırır, hətta cinayət işi başlanılıb və s. Amma məsələ burasındadır ki, biz bu problemi aradan qaldıra bilməmişik, bu problem hələ də qalmaqdadır və davam edir".
Ekspert bildirdi ki, məlum məsələ ilə bağlı mübarizə o qədər də ürəkaçan deyil. Bu baxımdan həmin şirkətlər ayrı-ayrı vaxtlarda vətəndaşların hüquqlarını kobud şəkildə pozur: "İndiki halda vətəndaşların sözügedən problemlə bağlı mübarizə metodları yalnız qanuni yollarla atılan addımlardır. Bunun hələlik yolu məhkəmələrdir. Təbii ki, ayrı-ayrı rəhbər şəxslərə, dövlət qurumlarına müraciətlər də müəyyən nəticələr verir. Amma bu nəticə həmişə olmur. Daha çox məhkəmə və ictimai qaydada mübarizə metodlarından istifadə daha səmərəli olar".
Günel CƏLİLOVA
