Məhərrəm Zülfüqarlı: "Makronun yürütdüyü ziyanlı siyasətə görə, hesab edirəm ki, Azərbaycan-Fransız Universitetinin fəaliyyəti nəzərdən keçirilməlidir"
Fransanın Azərbaycana qarşı düşmənçiliyi hər addımda özünü büruzə verir. Diqqət çəkən odur ki, bizi özünə düşmən sayan Fransada Azərbaycan dəyərlərinə qarşı açıq hücumlar baş verir, amma fransız hökumətinin tükü də tərpənmir.
Xurşidbanu Natəvanın Fransanın Evian-le Ba şəhərində qoyulan abidəsinin başına gətirilən oyunlar buna kiçik bir misaldır. Az qala hər gün təhqir olunan, vandalizmə məruz qoyulan abidə indi Parisə gətirilib. Fərqi nədir, məkan dəyişsə də, şovinizm, ksenofobiya, zorakılıq, vandalizm niyyətləri dəyişməyib ki…
Azərbaycan-Fransa əlaqələrini araşdırdıqda görürük ki, Makron hökumətindən əvvəl humanitar-mədəni sahədə əlaqələr olub. Hətta 2016-cı ildə Bakıda Azərbaycan-Fransız Universiteti (Azərbaycan-Fransa) açılıb. Hazırda bu ali məktəb Azərbaycan Dövlət Neft və Sənaye Universitetinin nəzdində fəaliyyət göstərir. Bir məsələ də var ki, bu universitet Azərbaycanın dövlət büdcəsindən maliyyələşir. Həm Azərbaycan-Fransız universiteti, həm də digər bu qəbildən olan ali məktəblər Azərbaycan dövlətinin büdcəsindən maliyyələşməməlidir, onlar özəl ali məktəb kimi öz maliyyəsini özü təmin etməlidir. Biz Azərbaycan-Fransız universitetinə maliyyə ayırırıq, Fransa da bizə qarşı açıq düşmənçilik siyasəti yeridir. Bunu necə anlamaq olar? Bu necə mədəni-humanitar münasibətdir ki, biz qarşılığında düşmənçilik, nifrət görürük, erməni separatizminə dəstək görürük, Azərbaycanın ərazi bütövlüyünə qarşı qəsd cəhdləri görürük? Azərbaycan öz ərazilərini işğaldan azad edib, amma Fransa hələ də separatizmi alovlandırmaq, Ermənistanı yeni işğala həvəsləndirmək sevdasındadır. Bu halda, Azərbaycan-Fransa Universitetinə nə ehtiyac var?
"İctimaiyyət də hesab edir ki, Azərbaycan-Fransız Universitetinə ehtiyac yoxdur"
AVCİYA-nın vitse-prezidenti, professor Məhərrəm Zülfüqarlı "Bakı-Xəbər"ə şərhində bildirdi ki, Azərbaycan-Fransız Universiteti Azərbaycan Prezidenti İlham Əliyevin və Fransanın sabiq Prezidenti Fransua Ollandın təşəbbüsü ilə yaradılıb, bu ali məktəb yaradılanda Azərbaycanla Fransa arasında əlaqələr bu şəkildə deyildi. "O dövrdə Fransa Azərbaycana qarşı indiki kimi davranmırdı, münasdibətlər tamamilə başqa cür idi. Düzdür, onların həmişə ermənipərəstliyi olub, amma indiki şəkildə açıq büruzə verilmirdi. Demək istəyirəm ki, Azərbaycan-Fransız Universiteti Makrondan əvvəlki hökumətin dövründə yaradılıb. Məqsəd də qarşılıqlı humanitar əlaqələrin gücləndirilməsi olub. Fransada Natəvanın heykəli açıldı, İncəsənət muzeyində də Natəvanla Dümanın görüşünü əks etdirən heykəl var. Makrona qədər vəziyyət bir qədər fərqli idi. Amma indi Fransa Azərbaycana qarşı açıq düşmənçilik siyasəti aparır. Bu halda hesab edirəm ki, Fransa və Azərbaycan arasındakı mədəni, humanitar məsələlərə yenidən baxılmalıdır. Makronun apardığı siyasət təkcə siyasi istiqamətdə deyil, mədəni və humanitar sahədə də ziyanlıdır. Sual yaranır ki, Fransa bizə qarşı düşmənçilik, kin bəslədiyi halda bu ölkə ilə müştərək universitetin qalmasına nə ehtiyac var? Makronun yürütdüyü ziyanlı siyasətə görə, hesab edirəm ki, Azərbaycan-Fransız Universitetinin fəaliyyəti nəzərdən keçirilməlidir. Çünki ictimaiyyət, ziyalılar arasında da xeyli sayda insanlar var ki, bu ali məktəbin qalmasının əleyhinədir. Fransa nə qədər ki, antiazərbaycan siyasətindən əl çəkməyib, bu universitetin fəaliyyətinə də ehtiyac yoxdur. Makron hökuməti bizə düşmənçilik edir, beynəlxalq qurumlarda əleyhimizə kampaniya aparır, qətnamə qəbul etdirir, biz də onlarla təhsil sahəsində əməkdaşlıq edirik, bu yolverilməzdir. İctimaiyyət də hesab edir ki, Azərbaycan-Fransız Universitetinə ehtiyac yoxdur. Bu universitetin dövlət büdcəsindən maliyyələşməsi də dayandırılsa yaxşı olar"-deyə qeyd edən M.Zülfüqarlı bu yaxınlarda Milli Məclisin Fransa ilə bağlı qəbul etdiyi sənədi xatıralatdı və bildirdi ki, Frsansa öz ziyanlı mövqeyindən əl çəkməyincə, təhsil sahəsində də əməkdaşlıq nəzərdən keçirilməlidir.
M.Zülfüqarlı hesab edir ki, ümumiyyətlə, ölkəmizdəki xarici ölkə universitetlərinin filiallarının hər biri özəl ali məktəb kimi fəaliyyət göstərməlidir. O qeyd etdi ki, inkişaf etmiş Qərb ölkələrinin universitetlərinin Azərbaycanda filiallarının olmasına, xarici ali məktəblərlə təhsil sahəsində əməkdaşlığa müsbət yanaşmaq olar: "Amma bir şərtlə ki, bunlar özəl universitetlər olsun. Azərbaycan qanunlarına uyğun olaraq müəyyən qurum müraciət etsin və ona uyğun şəkildə də öz maliyyəsini təşkil etsin, ora tələbələr müraciət edib oxusunlar.
Yenə də deyirəm, Azərbaycan-Fransız universiti o zaman açıldı ki, hələ onda Fransanın Azərbaycana qarşı mövqeyi düşmən mövqeyi deyildi. Azərbaycan-Fransa münasibətləri müsbət yöndə inkişaf edirdi. Azərbaycan tərəfi Fransada bir sıra abidələri bərpa edirdi, Azərbaycan rəsmilərinə Fransanın mükafatları verilirdi, təltiflər olunurdu. Amma bunlara baxmayaraq, universitetlərin yaradılması Azərbaycan qanunvericiliyi ilə tənzimlənməlidir. Xarici universitetlər özəl şəkildə fəaliyyət göstərməlidir. Bizdə Rusiyanın bir neçə universitetinin filialları var, bu da ya özəl olmalıdır, ya da Rusiyanın büdcəsi hesabına ola bilər. Xarici universitetlərin filiallarının yaranması müsbətdir, amma bir şərtlə ki, onlar Azərbaycanın dövlət büdcəsindən maliyələşməsinlər" - deyə M.Zülfüqarlı qeyd etdi.
M.Zülfüqarlının fikrincə, bu ali məktəblərdən yalnız Türkiyə-Azərbaycan Universiteti dövlət büdcəsindən maliyyələşməlidir, çünki bu bizim üçün çox əhəmiyyətlidir: "İndi Türkiyə-Azərbaycan Universiteti yaradılacaq, bu artıq istisna təşkil edir. Çünki qardaş ölkədir, bu müştərək səylə, təşəbbüslə yaranıb".
İradə SARIYEVA
