Kamran Əsədov: "Özəl universitetin ayaqda qalmasına səbəb məhz tələbədir, tələbə sayı azaldığı üçün ali təhsil müəssisəsinin təsisçiləri belə bir qərar qəbul edib"
Naxçıvan Universitetinin fəaliyyətinin dayandırılması ilə bağlı müraciət olub. Bu barədə elm və təhsil naziri Emin Əmrullayev fevralın 29-da keçirdiyi brifinqdə deyib.
Məlumat üçün bildirək ki, "Naxçıvan" Universiteti 1999-cu ildə Azərbaycan Respublikasının Ədliyyə Nazirliyində dövlət qeydiyyatına alınaraq ali təhsil müəssisəsi kimi fəaliyyətə başlayıb. Universitet Azərbaycanın paytaxtı Bakı şəhərindən kənarda yerləşən yeganə özəl ali təhsil ocağıdır. Burada 4 fakültə, 10 kafedra fəaliyyət göstərir. 1500-dək tələbə təhsil alır, 100-dək işçi çalışır.
Qeyd edək ki, 1999-2019-cu ildə universitetin rektoru təhsil ocağının yaradıcısı İsmayıl Əliyev olub. Sonradan ali məktəb Naxçıvan Muxtar Respublikası Ali Məclisinin sabiq sədri Vasif Talıbovun qardaşı Məhərrəm Talıbovun nəzarətinə keçib. Ötən ilin fevral ayında Naxçıvan Universitetinə Anar Kazımov rektor təyin edilib.
Qeyd etdiyimiz kimi, adıçəkilən universitetin bağlanması ilə bağlı rəsmən müraciət olunub. Təsisçi universitetin bağlanması ilə bağlı qərar qəbul edibsə, burda aidiyyəti qurumların heç bir günahı yoxdur. Ancaq təsisçinin anidən belə bir qərar qəbul etməsi istər-istəməz şübhəlidir. Maraqlıdır, "Naxçıvan" Universiteti neçə illik uğurlu fəaliyyətdən sonra niyə belə bir qərara gəlib? "Naxçıvan" Universitetinin bağlanması təsisçinin könüllü qərarı əsasındamı baş verir? Bağlanma qərarının arxasında başqa planlar ola bilərmi?
"Son illər bu universiteti seçənlər arasında azalma var, bu azalma daha çox 2-ci qrupdan olanlar arasında müşahidə olunur"
Suallarımıza cavab tapmaq üçün təhsil eksperti Kamran Əsədova müraciət etdik. O, "Bakı-Xəbər"ə açıqlamasında qeyd etdi ki, universitetdə çalışan işçilərin elmi dərəcələri başqa universitetlərdən zəif deyildi: "Naxçıvan" universitetində 4 nəfər elmlər doktoru, 20 nəfər fəlsəfə doktoru, magistrlar, dosentlər və s. var. Universitetdə 4 fakultə, 10 kafedra həmçinin 25 ixtisas üzrə 1400-dən çox bakalavr, magistr, doktorant, dissertantlar var. Naxçıvan universiteti kifayət qədər potensiala malik olan təhsil ocağı idi. Bununla yanaşı, adıçəkilən təhsil müəssisəsinin çox yaxşı kitabxana binası, xarici dil xidmət mərkəzi var. Bir sözlə, bu universitetdə tələbələr və müəllimlər üçün hər bir şərait yaradılıb. Hətta deyərdim ki, Bakıda yerləşən bir neçə özəl universitetdən daha yaxşıdır. Universitet mütəmadi olaraq reytinqlərdə belə iştirak edirdi".
"Naxçıvan" Universitetinin bağlanmasına gəlincə, ekspert bildirdi ki, son illər bu universiteti seçənlər arasında azalma var idi. Bu azalma daha çox 2-ci qrupdan olanlar arasında müşahidə olunurdu. Ümumiyyətlə, tələbə sayının azalması belə bir qərara səbəb olur: "Nəzərə almaq lazımdır ki, özəl universitetin ayaqda qalmasına səbəb məhz tələbədir. Bu səbəbdən də universitetin təsisçiləri belə bir qərar qəbul edib. Ancaq bu qərar universitetin tələbə və pedaqoji heyətinə təsir etməyəcək. Onlar digər ali təhsil məüssiəsində tədrislərinə davam edəcəklər".
Günel CƏLİLOVA
