Məhərrəm Zülfüqarlı: "İlham Əliyevin növbəti dəfə Prezident seçildikdən sonra qardaş ölkəyə ilk rəsmi səfəri çərçivəsində bu universitetinin yaradılması barədə sənədin imzalanmasının xüsusi əhəmiyyəti var"
Prezident İlham Əliyev növbəti dəfə seçkilərdə qalib gəldikdən sonra ilk rəsmi səfərini Türkiyə Prezidenti Rəcəb Taib Ərdoğanın dəvətilə qardaş ölkəyə etdi.
Azərbaycan Prezidentinin Türkiyəyə rəsmi səfəri çərçivəsində qardaş ölkə ilə bir sıra sahələr üzrə qarşılıqlı sənədlər imzalandı.
Fevralın 19-da Ankarada Prezident İlham Əliyevin və Prezident Rəcəb Tayyib Ərdoğanın iştirakı ilə Azərbaycan-Türkiyə sənədlərinin imzalanması mərasimi oldu. Burada diqqət çəkən məsələlərdən biri Türkiyə-Azərbaycan Universitetinin yaradılması oldu. Belə ki, "Azərbaycan Respublikasının Elm və Təhsil Nazirliyi ilə Türkiyə Respublikasının Ali Təhsil Şurası arasında Türkiyə-Azərbaycan Universitetinin yaradılmasına dair Anlaşma Memorandumu"nu Azərbaycanın elm və təhsil naziri Emin Əmrullayev və Türkiyənin Ali Təhsil Şurasının (YÖK) sədri Erol Özvar imzaladılar.
Uzun illər idi ki, Türkiyə-Azərbaycan Universitetinin yaradılması müzakirə edilirdi. Sözügedən məsələnin reallaşması o deməkdir ki, Azərbaycan və Türkiyə, eləcə də bütün türk dünyası üçün yüksək səviyyəli kadrlar hazırlanacaq. Bu da bizim gələcəyimiz, ortaq kökə, ortaq ənənələrə, ortaq tarixə, ortaq mədəniyyətə sahub olduğumuz bağların daha da dərinləşməsinə səbəb olacaq.
"Bu universitetin açılmasının mühüm cəhətlərindən biri odur ki, burada türk dünyası üçün yüksək səviyyəli kadrlar yetişdiriləcək"
AVCİYA-nın vitse-prezidenti, professor Məhərrəm Zülfüqarlı "Bakı-Xəbər"ə şərhində bildirdi ki, Türkiyə-Azərbaycan Universitetinin yaradılması məsələsinin sənədləşməsinin Prezident İlham Əliyevin Türkiyə səfərində reallaşmasının mühüm əhəmiyyəti var. Bu universitetin yaradılmasının bizim əlaqələrimizin dərinləşməsində xüsusi rol oynayacağını deyən professor Zülfüqarlı "Türkiyə-Azərbaycan Universitetinin yaradılması çox vacib məsələlərdən biridir. İlham Əliyevin növbəti dəfə Prezident seçildikdən sonra qardaş ölkəyə ilk rəsmi səfəri çərçivəsində bu universitetinin yaradılması barədə sənədin imzalanmasının xüsusi əhəmiyyəti var.
Fikrimcə, bu universitet çoxdan yaradılmalı idi"-deyə bildirdi.
M.Zülfüqarlının sözlərinə görə, Azərbaycanda Azərbaycan-Fransa Universiteti var, Rusiyanın bir neçə ali məktəbinin filialları fəaliyyət göstərir, amma Türkiyə-Azərbaycan Universiteti yox idi. "Bu universitetin açılmasının iki qardaş ölkə arasında əlaqələrin inkişafında, həm bütün türk dünyası ilə mədəni, iqtisadi, təhsil sahəsində əməkdaşlığında mühüm rol oynayacaq. Bu universitetin yaradılmasında Azərbaycan Prezidenti ilə Türkiyə Prezidenti arasında olan şəxsi dostluq münasibətləri də mühüm rola malikdir. Mənə belə gəlir ki, gələcəkdə bu istiqamətdə işlər davam etdirilməlidir.
Bu universitetin açılmasının mühüm cəhətlərindən biri odur ki, burada türk dünyası üçün yüksək səviyyəli kadrlar yetişdiriləcək. Bu eyni zamanda türk dünyası üçün kadrların yetişdirilməsi üçün atılan əhəmiyyətli addımdır"-deyə M.Zülfüqarlı qeyd etdi.
O, həmçinin vurğuladı ki, bu barədə sənədin Prezident İlham Əliyevin səfəri çərçivəsində imzalanması, bu məsələnin bu çərçivədə həllini tapması mühüm tarixi əhəmiyyətə malikdir.
M.Zülfüqarlı xatırlatdı ki, Prezident Əliyevin andiçmə mərasimində Azərbaycanın türk dünyası ailəsinə mənsub olduğunu, bizim türk dünyasından başqa ailəmiz olmadığını bəyan etməsindən sonra bu universitetin də yaradılmasında rəsmən razılıq əldə edilməsinin əhəmiyyəti misilsizdir.
İradə SARIYEVA
