Qafqaz Müsəlmanları İdarəsi 2024-cü ildə Həcc ziyarətinə getmək istəyən azərbaycanlı zəvvarlar üçün qiymətləri müəyyən edib. Məlumata görə, bir nəfər üçün ziyarət paketinin qiyməti 5 850 ABŞ dolları (10 min manat) təşkil edir.
Məlumat üçün bildirək ki, ziyarət vahid formada təşkil olunur və hava nəqliyyatı ilə həyata keçirilir. Ziyarətin qiymətinin yüksək olması cəmiyyət tərəfindən birmənalı qarşılanmayıb. Sosial şəbəkələrdə insanlar arasında bununla bağlı geniş müzakirələr başlayıb. Hətta facebook istifadəçiləri təklif edir ki, 10 min verib Həcc ziyarətinə getməkdənsə işğaldan azad edilən ərazilərin bərpasına kömək etmək daha məqsədəuyğundur. Qeyd edək ki, bu təklif sosial şəbəkə istifadəçiləri tərəfindən təqdir olunub. Onu da bildirək ki, Həccə gedənlərin əksəriyyəti orda bir neçə dəfə olub. Hər il bu qədər vəsait sərf edib ərəblərin büdcəsini doldurmaqdansa, Qarabağın bərpası üçün 10 000 manat sərf etmək daha məqsədli olar. "Həcilər" və ya "həcixanımlar" şeytana daş atmaq üçün 10 min sərf etməklə savab qazanmayacaq, Qarabağda bir məktəbin, bağçanın tikintisinə köməklik göstərərsə çoxlu sayda şəxsin xeyir-duasını qazanar.
Fatimə Hacıbəyli: "Hər il "günah sildirmək" adı ilə 10 min verib ziyarətə getməkdənsə, Qarabağın bərpası üçün işlər görsələr daha çox savab qazanarlar"
Sosioloq Fatimə Hacıbəyli "Bakı-Xəbər"ə şərhində bildirdi ki, həcc ziyarətinə getmək üçün tələb olunan məbləğ çox yüksəkdir: "10 min manat az pul deyil. Həmin pulu verib neçə insana kömək etmək olar. Sirr deyil ki, ətrafımızda nə qədər ehtiyaclı insanlar var. Bu səbəbdən də ictimai qınaq var. "Həci" titulunu qazanmaq istəyənlər ziyarətə getməkdənsə, daha savab iş görə bilərlər. Yaxşı olar ki, həmin insanlar dövlətimizə yardım etsin. Işğaldan azad edilən torpaqlarımızın bərpasına yardım əllərini uzatsın. Madam pulları çoxdur, xərcləməyə yer tapmadıqları üçün hər il günah sildirmək adı ilə 10 min verib ziyarətə getməkdənsə, Qarabağın bərpası üçün işlər görsələr daha yaxşı olar. Əhalinin həmin yerə tez köçməsi üçün dövlətə dəstək olarlarsa daha çox savab qazanarlar. Onu da deyim ki, şeytana daş atmaqla günahlar yuyulsa idi, dünyada bu qədər pis insan olmazdı".
Tural İrfan: "Kimin əlinə haradan pul keçdisə verib Həccə gedir ki, cənnəti satın alsın"
Ilahiyyatçı Tural İrfan "Bakı-Xəbər"ə açıqlamasında qeyd etdi ki, dini baxımdan 10 000 manat israf sayılacaq qədər yüksək rəqəmdir: "Həcc bir ibadətdir. İbadətdə israf isə haramdır. Həcc üçün nəzərdə tutulmuş bu məbləği tam halallıqla toplayan adam 3 yaxud 5 nəfər ola bilər, o da 10-15 il ərzində. Məlumdur ki, kimin əlinə haradan pul keçdisə verib Həccə gedir ki, həmin cənnəti satın alsın. Yaxud ona da "hacı filankəs" desinlər. Həcc imkanlı müsəlmanlara vacib olsa da, hazırda ölkəmizdə kifayət qədər sosial problemləri olan adamlar, ailələr olduğuna görə bizim insanımıza vacib deyil. Hələ də küçədə dilənən qarıların, şosselərdə maşın şüşəsi silib təkər qaraldan yetimlərin olduğu zamanda, minlərlə sosial yardım ala bilməyib, xəstələnəndə dərman tapa bilməyən ailənin olduğu bir zamanda haramıza yaraşır 10 min verib Məkkəyə getmək? Allah istəmir ki, sənin məmləkətində ac adam olduğu halda 10 min manat israf edib onun hüzuruna çıxasan. Ona görə Qurana baxmaq lazımdır, məntiqlə düşünmək lazımdır".
Günel CƏLİLOVA
