Elxan Əliyev: "Təhlükəsizlik kəmərindən istifadə həm də mədəniyyət göstəricisidir"
"Yol hərəkəti haqqında" Qanunun tələbinə görə, hər bir sürücü avtomobildə hərəkət edərkən kəməri bağlamalı və sərnişinlərin də kəməri bağlamasını təmin etməlidir. Qanunun tələbinin pozulmasına görə İnzibati Xətalar Məcəlləsində müvafiq məsuliyyət nəzərdə tutulub.
Məlumdur ki, təhlükəsizlik kəmərindən istifadə olunmaması yol-nəqliyyat hadisəsi zamanı böyük faciələrin yaranmasına səbəb olur. Bu səbəbdən təhlükəsizlik kəmərindən istifadə mütləqdir.
Qeyd edək ki, Daxili İşlər Naziriyinin Baş Dövlət Yol Polisi İdarəsi təhlükəsizlik kəməri ilə bağlı müraciət edib. Müraciətdə deyilir ki, təhlükəsizlik kəməri bizi həyata bağlayan bağdır: "Müasir avtomobillər uzun inkişaf yolu keçsə də, passiv təhlükəsizlik sisteminə aid olan təhlükəsizlik kəməri bu gün də sürücü və sərnişinləri qoruyan əsas vasitələrdən biridir. Dəfələrlə təsdiq olunub ki, yol-nəqliyyat hadisələrində təhlükəsizlik kəmərindən istifadə edən sürücü və ya sərnişinlər kəmərdən istifadə etməyənlərə nisbətən daha yüngül xəsarət alır. Bir çox hallarda isə onlar məhz kəməri bağladıqları üçün sağ qalır. Təəssüflə qeyd etməliyik ki, 2023-cü il ərzində yol qəzalarında həlak olan sürücü və sərnişinlərin 32,1 faizi, yaralananların isə 31 faizi təhlükəsizlik kəmərini bağlamayan şəxslər olub".
"Təhlükəsizlik kəməri yol hərəkəti təhlükəsizliyinin əsas elementlərindən biridir, bu baxımdan təhlükəsizlik kəməri ilə bağlı davranış, mədəniyyət formalaşmalıdır"
Təhlükəsizlik kəmərinin əhəmiyyəti haqqında danışan sosial sahə üzrə ekspert Elxan Əliyev "Bakı-Xəbər"ə açıqlamasında qeyd etdi ki, təhlükəsizlik kəmərinin əhəmiyyəti çox böyükdür. Yol-nəqliyyat hadisələrində, demək olar ki, 80% sürücünü ölümdən, ağır xəsarətdən qoruyur: "Təəssüf ki, bəzi insanlar hələ də təhlükəsizlik kəmərinin əhəmiyyətini, vacibliyini dərk edə bilməyib. Təhlükəsizlik kəmərinin heç bir halda zərəri yoxdur. Təhlükəsizlik kəməri yol hərəkəti təhlükəsizliyinin əsas elementlərindən biridir. Bu baxımdan təhlükəsizlik kəməri ilə bağlı davranış, mədəniyyət formalaşmalıdır. İnsanlar bunun əhəmiyyətini dərk etməli və başa düşməlidirlər ki, təhlükəsizlik kəməri insan həyatını qorumaq üçün hesablanmış bir texnologiyadır və müasir avtomobillərin hamısında da bu kəmər var. Bu baxımdan da təhlükəsizlik kəmərindən istifadə etmək lazımdır və vacibdir".
Ekspertin fikrincə, təhlükəsizlik kəmərindən istifadə həm də mədəniyyət göstəricisidir: "Hər kəs öz həyatını qorumaq üçün təhlükəsizlik kəmərindən istifadəyə diqqət yetirməlidir. Həmçinin maşındakı sərnişindən də bunu tələb etməlidir, çünki heç kəs qəza zamanı sərnişinin təhlükəsizliyini təmin edə bilməz. Böyük toqquşmalarda ölüm hadisəsi kəmər taxılmadığı üçün sürücünün və ya sərnişinin maşının ön şüşəsindən çıxması nəticəsində baş verir. Azərbaycan kimi sürücülük mədəniyyətinin inkişaf etmədiyi ölkələrdə təhlükəsizlik kəmərindən istifadə əsas şərtdir. Daxili İşlər Naziriyinin Baş Dövlət Yol Polisi İdarəsi təhlükəsizlik kəmərini bizi həyata bağlayan bağ adlandırıb. Çox düzgün yanaşmadır. Hər kəs həyatına sahib çıxmalıdır"
Günel CƏLİLOVA
