XXI əsrin ən böyük bəlalarından biri narkotik maddələr və psixotrop vasitələrin qanunsuz dövriyyəsi və narkomaniyadır. Təəssüf ki, Azərbaycan da bu bəladan yan keçməyib.
Ölkəmizdə narkotik maddələr və psixotrop vasitələrin yayılması ictimaiyyət nümayəndələri ilə yanaşı, dövlət qurumlarını da ciddi narahat etməkdədir. Narkotik maddələr və psixotrop vasitələrlə mübarizə ilə əlaqədar əsas görüləcək işlər onların satışını təşkil edən şəxslərin məsuliyyətə cəlb olunması və həmin maddələrin mənfi təsirlərini özündə əks etdirən təbliğat işinin aparılmasıdır.
Son günlər yayılan xəbərlərə görə, paytaxtın bir çox yerlərində, xüsusilə Xırdalanda, Yasamalda, Biləcəridə, Qaraçuxurda bina və tikililərin divarlarında, fasadlarda "SK.MEF", "24ks.cc" qeydlərinə rast gəlinir. Bəlli olub ki, bu kodlar və qeydlər narkotiki təbliğ edir. Belə ki, naməlum şəxslər "SK.MEF", "QİKS CC" kimi narkotiki təbliğ edən qeydlər yazmaqla ərazidə narkotik vasitələrin, psixotrop maddələrin satışı, təbliği ilə məşğul olur. Polis əməkdaşları tərəfindən keçirilmiş əməliyyat tədbirləri nəticəsində həmin şəxslər saxlanılıb və əməllərini etiraf edib.
Emil Maqalov: "Bu sahədə irəliləyiş əldə etmək istəyiriksə hamı birləşməlidir"
Regional Sosial Təşəbbüslərə Dəstək İctimai Birliyinin sədri, narkoekspert Emil Maqalov "Bakı-Xəbər"ə şərhində bildirdi ki, onlayn narkotik satışı digər ölkələrdə olduğu kimi Azərbaycanda da mövcuddur. Hüquq-mühafizə orqanlarının səyi nəticəsində bunun qarşısı alınır. Aidiyyəti digər qurumlar isə bu işdə effektiv fəaliyyət göstərmir: "Bu işlə Qeyri Hökumət Təşkilatları də məşğul olmalıdır. Ancaq danılmaz faktdır ki, QHT-lər bu gün ancaq Qeyri-Hökumət Təşkilatlarına Dövlət Dəstəyi Agentliyi ilə tanışlıq vasitəsilə iş görür. Ümumiyyətlə, aidiyyəti dövlət qurumları bu sahədə lazımı səviyyədə iş görmür. Bütün yükü güc strukturlarının üzərinə də atmaq olmaz. Mütləq şəkildə cəmiyyət birləşib narkotikə meylli gənclərlə işləməlidir. Meylli yeniyetmə və gənclərlə onların öz dili ilə danışıq aparmaq lazımdır. Onların başa düşəcəyi dillə danışıq aparılarsa bu sahədə nəticə əldə etmək olar. Bu şəxslərə terminlərlə nəyisə izah etsək onlar yenə öz bildiklərini edəcək. Qeyd edilən sahədə irəliləyiş əldə etmək istəyiriksə hamı birləşməlidir".
Könül İsmayılova: "Sosial şəbəkədə, təhsil ocaqlarında, hər hansı məkanın, binanın divarlarına narkotikin təbliği ilə məlumatlar yazılır, yayılır"
Psixoloq Könül İsmayılova "Bakı-Xəbər"ə şərhində bildirdi ki, bu gün narkotikin təbliği müxtəlif formada yayılır. Sosial şəbəkədə, təhsil ocaqlarında, hər hansı məkanın, binanın divarlarına narkotikin təbliği ilə məlumatlar yazılır, yayılır: "Narkotik elə bir bəladır ki, bunun qarşısı mütləq alınmalıdır. Bunu təbliğ edənlər aidiyyəti qurumlar tərəfindən aşkar olunmalıdır. Etiraf etmək lazımdır ki, güc strukturlarının fəaliyyəti bu sahədə danılmazdır. Onların səyi nəticəsində bu gün bizdə narkotik bəlası qlobal səviyyədə deyil. Ancaq bu problemin öhdəsindən gəlmək üçün hər kəs bir olmalıdır. Ilk növbədə televiziya, yazılı mətbuat, sosial şəbəkədə narkotikin ziyanları haqqında geniş məlumatlar yayılmalıdır. Gənclərin, gələcəyimizin məhv olmaması üçün bir olmaq lazımdır".
Günel CƏLİLOVA
