Azərbaycan gəncliyi dövlətinə, dövlətçiliyinə bağlı örnək bir gənclik kimi özünü çoxdan təsdiqləyib. Ölkənin ictimai-siyasi, mədəni həyatında Azərbaycan gənclərinin xüsusi yeri, çəkisi var.
7 Fevral növbədənkənar Prezident seçkilərində Azərbaycan gəncləri ən müxtəlif formalarda fəallıq göstərdilər. Könüllülər, gənclər təşkilatlarının təmsilçiləri, aparıcı siyasi partiyaların, ictimai qurumların nümayəndələri, tələbələr seçki prosesinə töhfələr verdilər.
Bildiyimiz kimi, Qoşulmama Hərəkatının Gənclər Təşkilatının təmsilçilərinin də müşahidəçi statusunda aktivliyini müşahidə etdik. Ölkəmizdə keçirilən Prezident seçkilərinin şəffaf, azad və ədalətli şəkildə keçdiyini gənclər də bəyan etdilər.
Gənclərin seçkidə həm seçici, həm müşahidəçi kimi fəal iştirakının əhəmiyyətini vurğulamalıyıq. Bu, ölkəmizin həyatında gənclərin oynadığı aktiv rolu göstərən amillərdən biridir. Cəmiyyətin aparıcı qüvvəsinə çevrilən Azərbaycan gənciliyi dövlətimizin sabahına sahib çıxacaq.
Gənclər seçkilərdə fəal iştirak edib...
Qeyd edək ki, Azərbaycan Tələbə Gənclər Təşkilatları İttifaqının (ATGTİ) fəalları da növbədənkənar prezident seçkilərində müşahidəçi qismində iştirak ediblər. Gənclər qeyd etdilər ki, Azərbaycanın bütün şəhər və rayonlarında vətəndaşlarımızın böyük coşqu ilə səs verməyə getdikləri builki seçkiləri tarixə ərazi bütövlüyü və dövlət suverenliyi tam bərpa olunmuş ilk seçkilər kimi düşəcək. Bu mühüm hadisədə ATGTİ də seçki qanunvericiliyindən irəli gələn hüquqları çərçivəsində fəal iştirak edib. Ölkənin demək olar ki, bütün seçki dairələrində çoxlu sayda seçki məntəqələrində tələbə-gənclər seçkiləri müşahidə ediblər. Seçicilərin iradəsini azad və sərbəst bildirməsinə maneçilik törətmədən səsvermə prosesini müşahidə edən tələbə gənclər, həmçinin seçki şəffaflığına da nəzarət ediblər. Qeyd edilənə görə, tələbə gənclər yalnız paytaxtımızda və ətraf bölgələrdə deyil, Azərbaycanın işğaldan azad edilmiş ərazilərində də aparılan seçki prosesini müşahidə ediblər.
"Qoşulmama Hərəkatı ölkələrində ilk uğurlu müşahidəmiz oldu"
Bu arada fevralın 8-də Qoşulmama Hərəkatı Gənclər Təşkilatının müşahidə missiyasının növbədənkənar prezident seçkilərinin ilkin yekunları ilə bağlı mətbuat konfransı keçirilib.
Bildirək ki, Qoşulmama Hərəkatının Gənclər Təşkilatının üzvü Jakob Eyeru Bakıda 6 fərqli qrupdan olmaqla müşahidə apardıqlarını deyib. Bildirib ki, həmin məntəqələrdə hər şey qanunauyğun şəkildə olub.
"Təşkilatımızın müşahidə heyəti səsvermənin bütün məntəqələrdə qərəzsiz və şəffaf şəkildə keçirildiyini görüb. Heç kim bizə haraya getmək lazım olduğunu deməyib, biz özümüz istədiyimiz yerləri müşahidə etmişik. Biz, həmçinin səsvermə bülletenlərinin sayılmasında da iştirak etmişik. Qoşulmama Hərəkatı ölkələrində ilk uğurlu müşahidəmiz oldu".
O qeyd edib ki, Qoşulmama Hərəkatında ilk Gənclər Təşkilatıdır ki, seçkilərdə müşahidəçi kimi iştirak edib. Bu onu göstərir ki, Azərbaycan hökuməti gənclərin inkişafına öz töhfəsini verir.
"Seçkilərdə gənc seçicilərin, gənclərin belə fəallıq göstərməsi əslində gözlənilən idi"
Tanınmış gənc fəal, Editor.az İnformasiya Portalının baş redaktoru Fərid Şahbazlı "Bakı-Xəbər"ə bildirdi ki, Azərbaycan dövlətinin həyatında gənclərin xüsusi yeri var. Bu baxımdan, o hesab edir ki, növbədənkənar prezident seçkilərində gənclərin aktiv iştirakı təbii qarşılanmalıdır. "Bilirsiz ki, Azərbaycanda keçirilən növbədənkənar prezident seçkilərini 90 mindən çox müşahidəçi izləyib. Onların təxminən 10 minə yaxını xarici müşahidəçilər təşkil edib. Onların hamısının açıqlamalarında diqqət çəkən məsələlərdən biri seçkilərdə seçicilərin, vətəndaşların xüsusi fəallığının altının cızılaraq qeyd olunmasıdır. Bu fəallıq göstərən seçicilər arasında Azərbaycan gəncləri, eyni zamanda ilk dəfə səs verən gənclər xüsusi üstünlük təşkil edib. Hesab edirəm ki, bu fəallıq təbiidir. Seçkilərdə gənc seçicilərin, gənclərin belə fəallıq göstərməsi əslində gözlənilən idi. Çünki bu seçki 44 günlük Vətən müharibəsi və lokal antiterror tədbirlərinin nəticəsi olaraq üç rəngli bayrağımızın Xankəndidə ucaldılmasından və Azərbaycanın bütün ərazilərində öz suverenliyini bərpa etməsindən sonra keçirilib" - deyə F.Şahbazlı bildirdi.
"Bu, gənclərin ölkənin taleyinə, gələcəyinə biganə olmadığının ciddi bir göstəricisidir"
F.Şahbazlı qeyd etdi ki, 44 günlük Vətən müharibəsində Ali Baş Komandanın rəhbərliyi altında Azərbaycan gəncləri böyük qəhrəmanlıq nümayiş etdirərək torpaqlarımızın işğaldan azad olunmasını təmin etdilər. "Təsadüfi deyil ki, elə buna görə 7 fevral seçkisi Zəfər seçkisi adlandırıldı. Bu baxımdan torpaqlarımızın işğaldan azad edilməsində həlledici rola malik olan gənclərimizin Zəfər seçkisində də aktiv iştirak edəcəyi tamamilə gözlənilən idi. Bu belə də oldu. Bunu Azərbaycan gənclərinin seçkilərdə fəal iştirakı onların ölkəmizin gələcəyinə, sabahına olan böyük marağının nəticəsi kimi qiymətləndirirəm. Gənclərimiz fərqindədir ki, Azərbaycan bir dövlət olaraq uğurla inkişaf edir, Azərbaycan bir dövlət olaraq artıq nəinki regionun, bütövlükdə dünyanın siyasi və iqtisadi güc mərkəzlərindən birinə çevirilir.
Əlbəttə, gənclər də o prosesdə yaxından iştirak etməklə, öz iradələrini ifadə etməklə öz seçimlərini ediblər, dövlətimizin gələcəyi, sabahı ilə bağlı öz mövqelərini ortaya qoyublar. Fikrimcə, gənclərin seçkilərdə fəal iştirakı vacib faktordur. Bu gənclərin ölkənin taleyinə, gələcəyinə biganə olmadığının ciddi bir göstəricisidir.
Eyni zamanda bilirsiz ki, Azərbaycan dövlət gənclər siyasətinin uğurla həyata keçirildiyi ölkələr sırasında yer alır. Bu gün gənclər hakimiyyətin müxtəlif qollarında təmsil olunur, dövlət idarəçiliyində yaxından iştirak edir. Şübhəsiz ki, dövlətin gənclər siyasəti, gənclərə olan münasibəti gənclərin özləri tərəfindən də yüksək qiymətləndirilir. Bu seçkidə onların aktiv formada iştirakı da bunun aydın nümunəsidir.
Təbii ki, bir çox beynəlxalq təşilatlar kimi Qoşulmama Hərəkatı Gənclər Təşkilatı da seçkinin beynəlxalq normalara uyğun keçdiyini, şəffaf, azad və əfalətli keçdiyini, seçici fəallığı ilə müşayiət olunduğunu qeyd etdi. Düşünürəm ki, bu Azərbaycanda keçirilən seçkilərin şəffaflığının, demokratikliyinin beynəlxalq müstəvidə növbəti təsdiqi idi" - deyə F.Şahbazlı vurğuladı.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
