Lənkəran-Astara Regional Mədəniyyət İdarəsinin təşkilatçılığı ilə adı Azərbaycanın hərb tarixinə qızıl hərflərlə yazılmış, iki dəfə Sovet İttifaqı Qəhrəmanı general-mayor Həzi Aslanovun anadan olmasının 114 illiyinə həsr edilmiş tədbir keçirilib.
Lənkəran-Astara Regional Mədəniyyət İdarəsinin rəisi Bəxtiyar Qılıncov, idarə aparatının məsul işçiləri və Lənkəran şəhərində fəaliyyət göstərən mədəniyyət müəssisələrinin rəhbərləri əvvəlcə generalın abidəsini ziyarət edib önünə gül dəstələri qoyublar. Eləcə ulu öndər Heydər Əliyevin və xalqımızın igid oğlunun timsalında Vətənimizin şəhid övladlarının xatirəsi ehtiramla anılıb.
Ziyarətçilər sonra Həzi Aslanovun ev-muzeyində olublar. Ölməz qəhrəmanın mənalı həyatı, igidliyi və İkinci Dünya müharibəsindəki şücaətindən danışan Muzeyin direktoru Həcər Nəsirova bildirib ki, o, Azərbaycan xalqının yetirdiyi ən böyük sərkərdələrdən biri olub. Onun döyüş yolunun öyrənilməsi gənclərin vətənpərvər ruhda tərbiyəsində böyük əhəmiyyət daşıyır.
Yekunda Lənkəran-Astara Regional Mədəniyyət İdarəsinin rəisi Bəxtiyar müəllim xatirə kitabına ürək sözlərini yazıb.
Məlum olsun ki, Həzi Əhəd oğlu Aslanov 1910-cu ildə Lənkəranın Gərmətük qəsəbəsində doğulub. Ailə vəziyyəti çətin olduğuna görə 12 yaşında Həzi kərpic zavodunda fəhlə işləyin atasına kömək edib. Oxumağa və təhsil almağa da böyük maraq göstərib.1930-cu illərdə Bakı və Leninqrad hərbi məktəblərinı başa vurub. Daha İki il Leninqrad süvari məktəbində oxuyub, onu Kotovski adına III Bessarabiya süvari diviziyasına taqım komandiri göndəriblər. İkinci dünya müharibəsi başlayanda o, Ukraynada xidmət edib. 1940-cı ilin noyabrında Həziyə vaxtından əvvəl mayor rütbəsi təqdim olunub. 1941-ci ildə Donbas ətrafında düşmən hücumlarını beş ay dəf etməklə, həm də onlara ağır itkilər verib. Onun bu qəhrəmanlığını əsas götürərək Moskvaya çağırılıb və Krıma 55-ci əlahiddə tank briqadasında briqada komandirinin müavini vəzifəsinə təyin edilib.1941-ci il iyunun 23-nə keçən gecə alman zirehli qoşunlara qarşı qeyri-bərabər döyüşdə Həzinin bacarıqlı sərkərdəlik qabiliyyəti tam bilinib, igidliyə görə "Qırmızı Ulduz" ordeninə layiq görülüb. Xarkov və Stalinqrad ətrafında gedən döyüşlərdə Həzinin başçılığı altında 55-ci tank briqadasının tankçıları düşmənə ağır zərbələr vurub, döyüşə-döyüşə 40 km-dən artıq yol gedib və Stalinqrad-Salsk dəmir yolunu tutmaqla, düşmənin xeyli canlı qüvvəsini, texnikasını sıradan çıxarıb onları Stalinqrad qruplaşmasının əsas magistralından məhrum ediblər. Sonra H.Aslanovun döyüşçüləri Kotelnikovo yaxınlığında gedən ölüm-dirim müharibədə böyük şücaət göstəriblər. Düşmənin 30 əks-hücumunu susdurub, bir batalyon piyada qoşunu, 30 tankı, 50 avtomobili sıradan çıxarıblar. Döyüşdə göstərdiyi şücaətə görə podpolkovnik H.Aslanov 1942-ci il 22 dekabrda Sovet İttifaqı Qəhrəmanı adına layiq görülüb.
Zəfər ORUCOĞLUAzərbaycan Jurnalistlər Birliyinin üzvü
