İstehsal və məişət tullantılarının, yəni zibillərin yığılması, daşınması və məhv edilməsi böyük bir problemə çevrilib. İdarə olunmayan – məhvi mümkün olmayan tullantılar yeraltı və yürüstü suların çirklənməsinə, ətraf mühitin zəhərlənməsinə, ev həşəratlarının, siçovul, siçan, tarakanların artmasına səbəb olur.
Bu da, öz növbəsində, yoluxucu xəstəliklərin yayılması və çoxalması deməkdir.
Bu gün bir sıra ərazilərdə, o cümlədən bölgələrdə də zibillərin daşınması sahəsində problem var. Məsələn, Abşeron rayonunda zibillər daşınmır. Həmin ərazidə yaşayan sakinlər sosial şəbəkədə yazaraq qeyd edir ki, rayonun Xırdalan şəhəri, Mehdi Hüseynzadə küçəsində zibil tullantıları qalaqlanıb. Antisanitar vəziyyət nəticəsində sakinlər ərazidən rahat keçə bilmirlər. Eyni zamanda, "AAAF Park" yaşayış kompleksinin də qarşısındakı zibillər daşınmır. Sakinlər onu da qeyd ediblər ki, ərazidə zibil qutuları kifayət qədər olmadığı üçün antisanitar vəziyyət yaranıb.
Aytəkin Kamranqızı: "Məişət tullantılarının daşınmasına nəzarət edən şöbələr də vəziyyətdən sui-istifadə edirlər"
Sosioloq Aytəkin Kamranqızı "Bakı-Xəbər"ə açıqlamasında bildirdi ki, məişət tullantılarının qalaqlanması, vaxtında daşınmaması halları ilə tez-tez qarşılaşırıq: "Ümumiyyətlə, istər mərkəz ərazilərdə, istər bölgələrdə, istərsə də kənar qəsəbələrdə bu, həll edilməyən problem olaraq qalır. Məişət tullantılarının daşınmasına nəzarət edən şöbələr də vəziyyətdən sui-istifadə edirlər. Nəticədə əziyyət çəkən yenə əhali olur. Bəzi ərazilərdə məişət tullantılarının yandırılmasının şahidi oluruq. Zibillərin çox olduğu və çox yandırıldığı ərazilərdə insanlar ruhi və nevroloji xəstəliklər, davranış pozuntularından əziyyət çəkir".
Sevil Abbasova: "Zibillərin yandırıldığı ərazilərdə hamilə qadınlarda uşaqsalma halları, sonsuzluq da müşahidə edilə bilər"
Həkim-terapevt Sevil Abbasova "Bakı-Xəbər"ə şərhində bildirdi ki, insan ömrünün qısalmasına təsir göstərən amillərdən biri də zibillərin yandırılmasıdır: "İnkişaf etmiş ölkələrdə zibil tullantıları yandırılmır. Azərbaycanda isə zibil tullantıları daha çox vətəndaşlar tərəfindən yandırlır. Vətəndaşlar özləri də bilmədən zəhərlənmələri üçün əllərindən gələni edirlər. Bundan əlavə, zibil tullantılarının yandırılması zamanı havaya qalxan qazlar və kül torpağa çökdüyü zaman içdiyimiz suya qarışır. Zibillərin yandırıldığı ərazilərdə hamilə qadınlarda uşaqsalma halları, sonsuzluq da müşahidə edilə bilər. Ağciyər xəstəlikləri, müxtəlif xərçəng növləri yaranar. Əgər səhər tezdən nəfəs alanda ciyərlərinə təmiz hava əvəzinə zibil yanığı qoxusu çəkirsənsə, hansı sağlamlıqdan söhbət gedə bilər?".
Günel CƏLİLOVA
