Azərbaycan Milli Elmlər Akademiyasının Lənkəran Regional Elmi Mərkəzində Quba Soyqırımı Memorial Kompleksi ilə birgə "20 Yanvar Müstəqilliyə gedən yolun şərəf və qəhrəmanlıq səhifəsidir" mövzusunda ZOOM platforması əsasında konfrans təşkil olunub. Konfransı giriş sözü ilə Lənkəran Regional Elmi Mərkəzinin direktoru, filologiya üzrə fəlsəfə doktoru Mehman Əliyev açdıqdan sonra 20 Yanvar şəhidlərinin, Azərbaycanın ərazi bütövlüyünün bərpası yolunda canlarını fəda edənlərin xatirəsi bir dəqiqəlik sükutla anılıb. M.Əliyev sonra çıxışına davam edərək deyib:- 34 il əvvəl – 20 yanvar 1990-cı ildə totalitar və avtoritar rejimin qəddar ordusu tərəfindən xalqımıza qarşı qanlı cinayət törədildi. Bu həm də insanlıq tarixinə ən vəhşi terror aktı kimi yazıldı. Qanlı faciədə 147 nəfər Azərbaycan vətəndaşı şəhadətə qovuşub, 638 nəfər xəsarət almış, 841 nəfər qanunsuz olaraq həbs edilib. Həyatını dəyişənlər arasında 5 millətin nümayəndəsi, 20-dən çox qadın və uşaq olub. Amma bizim üçü bu, təkcə faciə deyil, eləcə Müstəqilliyə gedən yolun şərəf və qəhrəmanlıq səhifəsidir. Həmin tarixə yeni-yeni qızıl səhifələr əlavə edən Ali Baş Komandan İlham Əliyev Azərbaycanı iqtisadi, hərbi cəhətdən elə bir səviyyəyə çatdırdı ki, ordumuz Ermənistanın işğalçı siyasətinə son qoydu, 30 il əsarətdə qalan Qarabağımızda qələbə bayrağımız dalğalandı və ulu öndərin arzuları çin oldu...
Bərdə Dövlət İdarəetmə və Texnologiya Kollecinin direktoru X.Musayev "20 Yanvar Moskvalı tələbənin xatirələrində", AMEA-nın Şərqşünaslıq İnstitutunun aparıcı elmi işçisi, tarix üzrə fəlsəfə doktoru, dosent S.Talıblı "25 Yanvar Neftçala hadisələri", Quba Soyqırımı Memorial Kompleksinin direktoru, tarix üzrə fəlsəfə doktoru R.Bayramova "Ulu Öndər Heydər Əliyevin 20 Yanvar faciəsinə verdiyi siyasi-hüquqi qiymət", Gəncə Dövlət Universitetinin "Azərbaycan tarixi" kafedrasının dosenti G.Əliyeva "20 Yanvar: Tarix yazmış qəhrəmanlar və unudulmağa məhkum satqınlar", AMEA-nın Lənkəran Regional Elmi Mərkəzinin elmi işlər üzrə direktor müavini S.Hüseynova "20 Yanvar xalqın qan yaddaşıdır", Azərbaycan Dövlət Pedaqoji Universitetinin Şamaxı filialının Tədris və elmi işlər üzrə direktor müavini Ş.Mikayılov "20 Yanvar Müstəqilliyə gedən yolun başlanğıcıdır", Akademiyanın Lənkəran Regional Elmi Mərkəzinin mütəxəssisi İ. Əhmədov "20 Yanvar hadisələri "Lənkəran" qəzetinin səhifələrində", AMEA-nın Gəncə bölməsi Nizami Gəncəvi Mərkəzinin direktoru, filologiya üzrə fəlsəfə doktoru Ə.Muxtarov "20 Yanvar hadisələri və Gəncə", Akademiyanın Şəki Regional Elmi Mərkəzinin "Ədəbi-mədəni mühit, folklor və etnoqrafiya" şöbəsinin elmi işçisi, həmin mərkəzdə gənc alim və mütəxəssislər şurasının sədri T.Adışirinov "20 Yanvar faciəsi bədii ədəbiyyatda", eləcə Astara rayonunun Şiyəkəran kənd məktəbinin müəllimi Y.Qulamov "20 Yanvar şəhidlərinin xatirəsinə qoyulan ilk abidə və yazılan ilk poema" mövzularında çıxışlarda bildiriblər ki, 20 Yanvar faciəsi Azərbaycanın azadlığı, ərazi bütövlüyü uğrunda mübarizə tarixində qəhrəmanlıq səhifəsidir. 1993-cü ilin iyun ayında xalqın təkid və tələbi ilə ikinci dəfə hakimiyyətə qayıdan ulu öndər Heydər Əliyevin gərgin səyləri sayəsində bu qanlı hadisələrə siyasi və hüquqi qiymət verilib, dünya ictimaiyyətinə və beynəlxalq təşkilatlara əsl mahiyyəti çatdırılıb. Ölkəmizin bütün bölgələrində azadlıq hərəkatının vüsət alması, zülmə boyun əyməyən vətənpərvər oğulların sovet ordusunun qoşunlarına qarşı əliyalın, mərd mübarizəsi 2003-cü ildən sonra Prezident cənab İlham Əliyevin rəhbərliyi altında həyata keçirilən məqsədyönlü daxili və xarici siyasət nəticəsində 30 il erməni tapdağına dönən, xarabazara çevrilən tarixi dədə-baba yurd yerlərimiz rəşadətli ordumuzun apardığı 44 günlük Vətən müharibəsi, lokal antiterror əməliyyatı zamanı tamamilə azad edildi.
Həmçinin natiqlər qanlı yanvarla bağlı öz rəy və mülahizələrini bölüşüb, təkliflərini veriblər. Konfransın yekununda Mehman Əliyev Quba Soyqırımı Memorial Kompleksinin rəhbərliyinə, çıxışçılara, iştirakçılara minnətdarlığını bildirdi, belə tədbirlərin davamlı olması üçün bundan sonra da əməkdaşlığın vacibliyini söyləyib.
Zəfər ORUCOĞLUAzərbaycan Jurnalistlər Birliyinin üzvü
