Son günlər Bakıda yağan qar səbəbindən yolların, prospektlərin, səkilərin qardan təmizlənməsi, sakinlərin və şəhər nəqliyyatının rahat hərəkətinin təmin edilməsi zərurətə çevrildi.
Lakin paytaxt sakinləri Bakının qardan təmizlənməsi prosesində bir vaxtlar xaricdən alınıb gətirilən qar təmizləyən texnikaları görmədiyini deyir. Sosial şəbəkələrdə, Telegram kanallarında yayılan videogörüntülərdən də aşkar görünür ki, qartəmizləyən texnikalar ortada yoxdur. Sakinlər deyir ki, Bakıda qarın təmizlənməsi işində qar təmizləyən texnikalar gözə görünmür, küçələrin, prospektlərin qardan təmizlənməsinə yenə də canlı insan qüvvəsi cəlb edilib. Sakinlərin sözlərinə görə, bir neçə il bundan əvvəl qar təmizləyən texnikalar alınmışdı və paytaxtda onlara tez-tez təsadüf olunurdu. Bu gün paytaxt yollarının qardan təmizləməsi işində yenə də polislər aktivlik edir və ərazilərdəki "JEK" işçiləri prosesə cəlb ediliblər. Elə biz özümüz də son günlər küçələrdə daha çox əlində qartəmizləyən kürək tutan insanları görürük.
Vaxtilə alınıb Bakıya gətirilən qartəmizləyən texnikalardan niyə istifadə edilmir? Bəlkə elə vaxtda istifadə edilir onu sakinlər görmür? Qartəmizləyən texnikalar hardadır ki, yenə də xadimələr, "JEK" işçiləri yolları təmizləyir?
İlqar Hüseynli: "...Prosesdə texnikanın deyil, canlı qüvvənin iştirak etməsi, istər-istəməz, vətəndaşlarda və tədqiqatçılarda suallar doğurur"
Ekspert İlqar Hüseynli "Bakı-Xəbər"ə bildirdi ki, ümumiyyətlə şəhər təsərrüfatının idarə olunması bütün dünyada ən prioritet məsələdir. "Təəssüflər olsun ki, Bakı şəhərinin təsərrüfat sisteminin idarə olunmasında biz bu yenilikləri, bu texnoloji dəyişiklikləri hələ də görə bilmirik. İstər yay, yaz vaxtlarında küçələrin süpürülməsi, istərsə də qışda qarın təmizlənməsi prosesində hələ də canlı qüvvədən istifadə olunur. Əlbəttə, prosesdə texnikanın deyil, canlı qüvvənin iştirak etməsi, istər-istəməz, vətəndaşlarda və tədqiqatçılarda suallar doğurur. Onlar burada hansısa korrupsiya hallarının olmasından şübhələnirlər. Çünki alınan texnikaların görünməməsi, onunla bağlı hansısa dəyişikliyin baş verməməsi insanlarda və qurumlarda, mətbuatda belə fikirlər yaradır ki, görünür, texnikalarla bağlı ciddi korrupsiya halı mövcuddur, bu texnikalar ya alınıb silinir, ya alınmır ora ayrılan vəsait başqa yerə yönəldilir. Şübhə yaranmasına əsas verən faktorlardan biri budur. İkincisi məsuliyyərsizlik məsələsidir, üçüncüsü, yerli idarəetmə sisteminin doğru düzənə çıxmaması ilə bağlıdır. Dünyanın əksər ölkələrində böyük şəhər bələdiyyələri formalaşıb. Meriya institutu var. seçkili qurumlar var. Təəssüflər olsun ki, bu bizim şəhərdə tətbiq olunmur. Düzdür, ayrı-ayrı rayonların bələdiyyələri yaradılıb, onların fəaliyyəti isə formaldır, büdcələri, vəsaitləri yoxdur. Şəhər təsərrüfatının idarə olunmasına bələdiyyələrin çox ciddi şəkildə qatqısı olmalıdır. "JEK" və digər aidiyyəti qurumların hamısı ləğv olunub, onların səlahiyyətləri və onlara ayrılan maliyyə vəsaiti seçkili orqanlara ötürülməlidir".
İ.Hüseynli hesab edir ki, bələdiyyələr də seçkili orqan olduğu üçün şəhər təsərrüfatının saxlanılmasında rəqabət əsaslı bir fəaliyyət qurmalıdır. "Burada problem həm də ikili idarəetmə sisteminin olması ilə bağlıdır. Bəzi hallarda insanlar bələdiyyələrdən şikayət edirlər ki, bələdiyyə öz işinin öhdəsindən gəlmir, bələdiyyə də deyir ki, bu işin və pulun əsas hissəsi "JEK"lərə verilir".
O vurğuladı ki, burada da ikili idarəetmə sistemi öz mənfi rolunu oynamış olur.
Departament: "Şaxtalı hava şəraitində qarın təmizlənməsi və xüsusi təyinatlı texnika vasitəsilə yollara duz səpilməsi həyata keçirilib"
Bakı Şəhər İcra Hakimiyyətinin (BŞİH) Bakı Şəhər Mənzil Kommunal Təsərrüfatı Departamentindən "Bakı-Xəbər"ə "Bakı Şəhər Mənzil Kommunal Təsərrüfat Departamentinin əməkdaşları yanvar ayının 13-dən etibarən gücləndirilmiş iş rejimində keçid ediblər. Axşam saatlarından səhərə kimi yağan qarın əsas küçə, prospekt və piyada səkilərindən, avtobus dayanacaqları və metro stansiyalarının qarşısından təmizlənməsini aparıblar. Həmçinin, şaxtalı hava şəraitində qarın təmizlənməsi və xüsusi təyinatlı texnika vasitəsilə yollara duz səpilməsi həyata keçirilib.
Məhəllədaxili yollarda və binaların həyətlərində isə rayon mənzil kommunal təsərrüfatı birlikləri tərəfindən təmizlənmə işləri aparılmışdır. Hazırda qardan təmizlənmiş ərazilərdə təmizlik işləri aparılır, yol kənarları və digər ərazilər yuyulur"-deyə bildirildi.
İradə SARIYEVA
