Son vaxtlar Naxçıvana uçuşlarla bağlı problemlər səngimək bilmir. Naxçıvanda yaşayan sakinlər öz evlərinə getmək üçün təyyarə bileti tapmaqda çətinlik çəkir. Sakinlər qeyd edir ki, Naxçıvana getmək üçün bilet ala bilmirlər: “Kiminsə tanışı varsa, yalnız onun vasitəsilə bilet tapa bilir. Ya da çox baha qiymət deyirlər. Ona görə də uzun növbələr var”.
Qeyd edək ki, ictimai xadimlər Naxçıvana getmək üçün təyyarə bileti tapılmaması ilə bağlı narazılıq edir.
Onu da bildirək ki, “Azərbaycan Hava Yolları” QSC-nin yaydığı məlumatda vurğulanır ki, AZAL sərnişinlərin Bakı-Naxçıvan reyslərinə olan tələbatını tam ödəyir və bu istiqamətdə heç bir sərnişin biletsiz qalmayıb. Qeyd olunub ki, sərnişinlərin artan tələbatına cavab olaraq Bakı-Naxçıvan-Bakı marşrutu üzrə gündəlik reyslərin sayı 10-dan 12-yə çatdırılıb.
Gündəlik reyslərin sayı artırılsa da, sərnişinlər öz evlərinə gedə, yaxınlarının xeyir-şər məclisində iştirak edə bilmir. Bu problem necə həll olunmalıdır?
“Bu problem tək naxçıvanlılara deyil, həm də bölgənin inkişafına maneçilik törədir, sahibkarlar o bölgəyə investisiya yatırmaqda maraqlı olmayacaq”
Iqtisadçı Əli Əlirzayev “Bakı-Xəbər”ə açıqlamasında qeyd etdi ki, Naxçıvan Muxtar Respublikası blokada şəraitindədir. Bu səbəbdən də Naxçıvanla hazırda yeganə əlaqə vasitəsi hava nəqliyyatıdır. Quru yolla yalnız İran ərazisindən keçməklə gediş mümkündür. Quru sərhədləri bağlıdır. İran ərazisindən də keçmək mümkünsüzdür: “Naxçıvana gediş-gəlişin rahat olması üçün quru yol açılmalıdır. Həmçinin, təyyarə reyslərinin sayı artırılmalıdır. Əlavə reyslər olsa da, kifayət etmir, tələbat nəzərə alınmalıdır. İnsanlara zülm etmək olmaz. Naxçıvan sakinləri, demək olar ki, hər il bu problemlə üzləşir. Xüsusən yay aylarında Naxçıvana gediş-gəliş çətinləşir. İnsanlar qohumlarını, ailə üzvlərini ziyarətə gedə bilmirlər”.
Ekspert hesab edir ki,bu problem tək naxçıvanlılara deyil, həm də bölgənin inkişafına maneçilik törədir. Sahibkarlar o bölgəyə investisiya yatırmaqda maraqlı olmayacaq. Çünki gediş-gəliş məsələsənin çətin olduğunu düşünəcəklər və o bölgəyə investisiya yatırmayacaqlar: “Onu da deyim ki, elektron bilet satışı sistemi mövcud idi. Belə bir sistem varsa aviakassanın qarşısında yaşanan növbələrin səbəbi nədir? Elektron bilet satışını deyirdiniz, hanı o biletlər?”.
Həmsöhbətimiz onu da əlavə etdi ki, biletlərin tapılmamasının bir səbəbi də onların turizm şirkətlərinə satılmasıdır. Məlumdur ki, Naxçıvana tur səfərlər təşkil olunur. Biletlər turizm şirkətlərinə baha qiymətə satıldığı üçün bu gün kassalarda bilet tapılmır. AZAL-la bağlı baş verən xoşagəlməz olaylara son qoyulması üçün məsələyə dövlət tərəfindən reaksiya verilməlidir.
Günel CƏLİLOVA
