“Bəzən həkimlər qida əlavələrini müalicə kursunun içərisində digər dərmanlarla yanaşı reseptdə yazır. Bu tamamilə yanlışdır”. Bunu Milli Məclisin Səhiyyə komitəsinin iclasında komitə sədri Əhliman Əmiraslanov bildirib.
O qeyd edib ki, buna nəzarət ciddi olmalıdır. “İnanıram ki, “Dərman vasitələri haqqında” qanuna təklif edilən dəyişiklərdən sonra qida əlavələrinin dərman kimi yazılması təcrübəsindən əl çəkiləcək. Bu çox zərərli adətdir”.
Qeyd edək ki, son zamanlar əksər həkim qida əlavələrini də dərman kimi reseptə yazır. Bu isə düzgün deyil. Dəfələrlə, aidiyyəti şəxslər və Azərbaycan Qida Təhlükəsizliyi Agentliyi bu məsələ ilə bağlı narazılıqlarını bildirsələr də, nəticə gözə dəymir.
“Bioloji aktiv qida əlavələrini reseptə yazan həkimlər və onun satışını həyata keçirən şəxslər inzibati qaydada cəzalandırılmalıdır”
Həkim ekspert Pərvanə Mustafayeva “Bakı-Xəbər”ə açıqlamasında qeyd etdi ki, bioloji aktiv əlavələrin satışı ölkəmizdə geniş vüsət alıb: “Bioloji aktiv əlavələr olduqca baha qiymətə satılır. Məlumat üçün deyim ki, bioloji fəallığa malik qida əlavələri əsas qidalandırıcı birləşmələr sinfinə daxil olan komponentlərin (vitamin, mineral və s.) orqanizmdə çatışmazlığının aradan qaldırılması, xüsusi fizioloji funksiyaların dəstəklənməsi və ya orqanizmin normal fəaliyyətinin təmin edilməsi baxımından qida rasionunu zənginləşdirmək məqsədilə istifadə olunur. Bioloji fəallığa malik qida əlavələri orqanizmin gücləndirilməsi, qidanın zənginləşdirilməsi məqsədilə həkim tərəfindən tövsiyə oluna bilər, lakin xəstəliklərin qarşısının alınması və ya müalicəsi məqsədilə təyin olunan dərman vasitələrini əvəz edə bilməz. Yəni bioloji fəallığa malik qida əlavələri dərman vasitəsilə eyni tərkibli ola bilməz. Xəstəliyin diaqnostikası müayinələr nəticəsində təsdiq edildikdən sonra resept nüsxəsində ona təsir edən dərman preparatlarının təyinatı yazılır. Amma bioloji aktiv əlavələr belə deyil. Həkimin ciddi dərman preparatı kimi bioloji qida əlavələrini reseptdə qeyd etməsi, əlbəttə ki, yanlışdır”.
Ekspert onu da bildirdi ki, bioloji aktiv qida əlavələrini reseptə yazan həkimlər və onun satışını həyata keçirən şəxslər inzibati qaydada cəzalandırılmalıdır. Amma prosesə nəzarətin necə həyata keçiriləcəyi məlum deyil.
Günel CƏLİLOVA
