Dünən (20 iyun-red.) məlumat yayıldı ki, Gədəbəyin Söyüdlü kəndində sakinlər süni göl tikintisinə mane olmağa çalışıblar.
Onlar gölün suyunun təsərrüfata və əkin sahələrinə ziyan vurduğunu deyiblər. Bunun da nəticəsində kənd sakinləri ilə polis arasında qarşıdurma yaşanıb.
Məsələ ilə bağlı Daxili İşlər Nazirliyinin yaydığı ilk məlumatda deyilirdi: “Bu gün günorta saatlarında Gədəbəy rayonu Söyüdlü kəndində bir qrup şəxs kənd ərazisində inşa olunan süni gölün tikintisinə qanunsuz müdaxilə edib. Polis əməkdaşları tərəfindən qaydalara əməl etməyən şəxslərlə profilaktik iş aparılmaqla onlar ərazidən kənarlaşdırılıb”.
Qeyd edək ki, sosial şəbəkələrdə qarşıdurmanın görüntüləri yayılıb. Həmin görüntülərdə polislərdən birinin yaşlı qadına qarşı gözyaşardıcı qazdan istifadə etməsi geniş müzakirəyə yol açıb. Vətəndaşların əksəriyyəti bu əmələ görə həmin polisi qınayıb. Ancaq hiss olunur ki, bu hadisəyə görə ümumi polisin fəaliyyətini də qaralamağa cəhdlər edilir. DİN-in yaydığı son məlumatda bildirilir ki, polisin etdiyi həmin hadisə ilə bağlı araşdırma aparılır: “Gədəbəy rayonu Söyüdlü kəndində bir qrup şəxsin kənd ərazisində inşa olunan süni gölün tikintisinə qanunsuz müdaxiləsilə bağlı 2 aydır ki, həmin şəxslərlə rayon icra hakimiyyəti və polis əməkdaşları tərəfindən profilaktik izahat işləri aparılıb. Ancaq bütün tədbirlərə baxmayaraq, dünən həmin şəxslərin müəssisə əməkdaşlarına hücum etməsi ilə əlaqədar polis əməkdaşları əraziyə cəlb olunaraq onların qanunsuz əməllərinin qarşısını alıblar.
Təəssüf ki, sosial şəbəkələrdə yayılan görüntülər törədilən qanunsuz hərəkətlərin digər tərəflərini əks etdirmir. Qəsdən, məqsədli olaraq polis əməkdaşının qadınlardan birinə qarşı xüsusi vasitədən istifadə etməsini göstərirlər. Polis əməkdaşı emosiyaya qapılaraq qadına qarşı ciddi qəbahətə yol verib və bunu qəbul edirik. Bununla bağlı müvafiq araşdırma aparılır, onun əməlinə hüquqi qiymət veriləcək.
Vətəndaşlara yaxşı məlumdur ki, əsasən Bakı şəhərində qanunsuz aksiya cəhdlərində iştirak edən qadınların polis əməkdaşlarının ünvanına səsləndirdiyi nalayiq ifadələr, hüquqazidd hərəkətləri ilə bağlı çoxsaylı faktlar var və bunlar jurnalistlər tərəfindən çəkilib, yayılıb. Orada da aşkar görünür ki, polis əməkdaşları həmin qadınlara qarşı yüksək təmkin və intizam nümayiş etdiriblər. Dəfələrlə olub ki, polis əməkdaşları Azərbaycan qadınına yaraşmayan hüquqazidd hərəkətlərə məruz qalsa da həmin qadınlara qarşı hər hansı xüsusi vasitə tətbiq edilməyib, yaxud cəza verilməsi ilə bağlı məsələ qaldırılmayıb”.
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, baş verən hadisədə qınanılmalı məqamlar var: “Həmin kadrlara hamı kimi mən də baxdım. Yaşlı bir Azərbaycan xanımına qarşı gözyaşardıcı qazdan istifadə ediblər. Mən bu hadisə ilə bağlı çox da ətraflı danışmaq istəmirəm. Sosial şəbəkələrdə bununla bağlı çox lüzumsuz payıaşımlar edilir. Bəziləri fürsətçil kimi davranaraq, polisə olan kinlərini ifadə edirlər. Polisin də hansısa addımında nöqsan ola bilər. Belə hallarla bağlı araşdırma aparılıb, lazımi tədbirlər görülür. Artıq DİN rəhbərliyi faktla bağlı xidməti araşdırmalara start verib. Məlumat üçün deyim ki, DİN dövlət qulluğunun xüsusi növünə aid olan dövlət qurumudur. Ona görə də, bu qurumun fəaliyyət istiqamətləri şəfaf şəkildə olmalıdır. Ancaq əməliyyatların elə detalları var ki, onlar cəmiyyətə tam çılpaqlığı ilə açıqlanmır. Bəzi ağır əməliyyatıarla bağlı hesabatlar təqdim edilir. Hətta bəzi Avropa ölkələrinə belə nümunə olacaq uğurlu əməliyyatlar həyata keçirilir. Mən də bir vətəndaş kimi baş verən son hadisədən təsirlənirəm. Amma hisslərimi boğmağa çalışıram. Çünki hər hansı fikir söyləyib, hadisələri qabaqlamaq fikrim yoxdur. Gəlin xidməti araşdırmanın sonuni gözləyək. Onsuz da bununla bağlı ictimaiyyətə məlumat veriləcək. Mən Azərbaycan vətəndaşlarına da səslənirəm. Hissə qapılıb böyük bir şəxsi heyəti olan polis qurumunu hədəfə, qınaq ünvanına gətirmək olmaz. Ola bilər ki, hansısa polis səlahiyyət həddini aşıb, ekstremal situasiyada müavizinətini qoruya bilməyib. Belə düşünmək olmaz ki, belə hallar polis rəhbərliyinin gözündən yayınır. Heç vaxt belə olmayıb, bu dəfə də olmayacaq. Səbrli olub, son nəticəni gözləyək”.
Məhəmmədəli QƏRİBLİ
