Gənclərin “avtoritet”lərə, oğru dünyasına, oğrulara həsr olunan mahnılara marağı çoxdur. Heç şübhəsiz ki, burada yeniyetməlik və gənclik amilinin musiqi duyumu, tələbatı öz sözünü deyir. Bilirik ki, son zəng tədbirlərində bəzi məktəblərdə “vorovskoy” mahnılar səsləndirilib. Buna birmənalı yanaşma olmasa da, bir çoxları hesab edir ki, gənclərin bu davranışı normal qarşılanmalıdır.
Onlara görə, bu gənclərin emosionallığından, təbiətindən doğan bir məsələdir. Doğrudur, yeniyetmə gənclərin bu mahnılara müntəzəm qulaq asması yaxşı bir hal deyil. Amma bu da əsas vermir ki, “avtoritet mahnılar”ına qulaq asdıqları üçün onları ucdantutma qınayaq. Bəzi ekspertlərə görə, son zəng günündə şagirdlərin “Ata”, “Ana” muğamına, məktəbi, müəllimi, təhsili tərənnüm edən mahnılara qulaq asması doğru olardı. Amma belə deyilsə də, şagirdlərin “avtoritet mahnılar”ına qulaq asmasını məktəblərin, təhsilin “bir nömrəli” probleminə çevirmək, məktəbləri, oradakı təhsil mühitini, müəllimlərin əməyini qaralamaq, gecə-gündüz sosial şəbəkələrdə, saytlarda anti-məktəb kampaniyası aparılması qətiyyən doğru deyil. “Filan məktəbin şagirdləri yığışıb “vorovskoy mahnıya qulaq asdılar, rəqs etdilər, məktəb rəhbərliyi hara baxır” kimi söhbətlərin mediada fırladılması doğru deyil. O məktəblərin elə yüksək nəticə əldə edən şagirdləri olur ki, heç ona görə məktəblər haqda müsbət bir söz demək istəmirlər. Halbuki, pisi deyəndə, yaxşını da demək lazımdır.
“Biz onları necə qınaya bilərik...”
Psixoloq Könül Vaqifqızı “Bakı-Xəbər”ə bildirdi ki, bu gün Azərbaycan məktəbinin prioblemi çoxdur, ən böyük problemlərdən biri isə şagirdlərin “avtoritet mahnılar”ına qulaq asması yox, psixoloq çatışmazlığıdır. Psixoloq qeyd etdi ki, gənclərin bu cür mahnılara qulaq asmasını qınağa çəkənlər onların gənc, odlu-alovlu olduğuna diqqət yetirməlidir. O vurğuladı ki, gənclər həyatlarının ən emosional mərhələsini yaşadıqları üçün onların oğru aləmi ilə bağlı mahnılara qulaq asması təbiidir. K.Vaqifqızının dediyinə görə, oğru alamindən bəhs edən mahnılar qaynar qanlı emosional gənclərə xoş gəlir, çünki o mahnılar oynaq, axıcı ritmə və yaddaqalan sözlərə, mətnə malikdir, bu sözlərdən də gənclər ləzzət alır. K.Vaqifqızı hesab edir ki, bu gün gənclərin “vorovskoy mahnılara” qulaq asması keçicidir və onlar müəyyən yaşdan sonra bu mahnılara qulaq asmayacaqlar. Bu gənclərin içindən bəlkə də mində, on mində biri oğru həyatı yaşayacaq, yaxud meyxanaçı olacaq, qalanlar isə buna müəyyən zaman ərzində qulaq asacaqlar, sonra isə zövqləri dəyişəcək. “Bu cür manhılara maraq müvəqqətidir, bir müddətdən sonra indiki gənclər o mahnılara artıq qulaq asmayacaqlar. Son zəng günü müəyyən gənclər yığışıb mahnıya qulaq asıblar, oynayıblar, hansısa cinayət törətməyiblər ki. Həmin gün şənləniblər, deyib-gülüblər. Bu onların haqqıdır. Baxıram ki, sosial şəbəkələrdə az qala hər kəs ittihamçı rolundadır. Sanki o gənclər böyük cinayət edib. Belə olmaz. O gəncləri qınayanlar ortaya elə mahnılar çıxarıb o mahnıları gənclərə sevdirsinlər ki, onlar bayağı mahnılara meyl etməsinlər. Hara baxırsan bayağı mahnıdır, küçələrdə, internetdə oğru dünyasına aid mahnılar təqdim olunur. Bu halda gənclikdən o mahnılara qulaq asmamağı necə tələb edə bilərik ki, biz onların ruhuna uyğun mahnılar təqdim edə bilmirik”-deyə bildirən müsahibimiz hesab edir ki, gəncliyin belə mahnılara qulaq asmasını qloballaşdırmaq, cəmiyyətin ən böyük problemi kimi qələmə vermək olmaz. O vurğuladı ki, bəzilərinin əlinə təhsili, məktəbi qaralağa fürsət düşüb, amma bu çox ziyanlıdır. “Əgər təhsilin, məktəbin problemlərindən yazmaq istəyirlərsə, araşdırsalar çox problemlər üzə çıxara bilərlər. Amma gənclərin bu cür mahnılara qulaq asmasını məktəbin əsas problemi kimi təqdim etmək, buna görə məktəbi, təhsili qaralamaq yolverilməzdir. Sizinlə danışıram, keçmişlə bağlı müəyyən məlumatlar yada düşür. Bir vaxtlar kütləvi olaraq caza, roka, estradaya qulaq asan gənclik olub, o zamanlar onlar da sərt tənqid olunub. Məşhur alimlər, elm xadimləri, tanınmışlar var ki, gənclik illərində cazla, rokla maraqlanıblar. Biz onları necə qınaya bilərik? Gəncliyin ruhunu heç zaman zədələmək olmaz”-deyə psixoloq qeyd etdi.
Psixolqun sözlərindən belə görsəndi ki, gəncliyin bu mahnıların havasına uçması müvəqqəti xarakter daşıyır və onlar zamanla bundan uzaqlaşacaqlar...Biz də düşünürük ki, əlbəttə, zamanla bu həllini tapacaq və bunu məktəbin, təhsilin problemi kimi təqdim etmək olmaz.
Aytəkin KƏRİMLİ
