Rayonlarda istər əmək haqlarının, istərsə də kommunal xidmətlərin haqlarının ödənilməsi əsasən terminallar və bankomat vasitəsilə həyata keçirilir. Ancaq bəzi bölgələrdə bu texniki vasitələrin sayı azdır. Bu səbəbdən də onların qarşısında uzun növbə olur.
Belə bir hal İsmayıllının Cülyan, Talıstan, Gəndov və digər kəndlərdə müşahidə olunur. Adıçəkilən ərazinin sakinləri qeyd edir ki, aldıqları pensiya və digər ödənişlərin məbləği qarşılığında pul çıxarmaq üçün rayon mərkəzinə gedib-gəlmək onlara sərf etmir.
"İnsanları çətin vəziyyətdə qoymamaq üçün bankomatların artırılması ilə bağlı tədbirlər həyata keçirilməlidir"
Bölgələrdə bankomat probleminin olması ilə bağlı fikir bildirən bank sahəsi üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, bu problem ucqar dağ kəndlərində, bir çox ərazilərdə müşahidə olunur: "Hətta Lerikin bir sıra kəndlərində belə bankomat yoxdur. Bunun səbəbi isə banklarla bağlıdır. Yəni banklar istədikləri əraziyə bankomat qoyur, ancaq onlara sərf etməyən ərazidə isə heç nə olmur. Banklar əsasən müştəri bazası olan ərazidə bankomat qoymağa üstünlük verir. Nəzərə almaq lazımdır ki, kənd yerlərində əhali sayı azdır. Bu da banklara sərf etmir. Həmçinin, bankomatın qoyulmağı ilə də iş bitmir. Gərək bank hər ay bankomata pul yerləşdirsin".
Ekspert hesab edir ki, problemin həlli üçün "Azərpoçt"un bank lisenziyası genişləndirilməlidir. "Azərpoçt" Azərbaycanda yeganə qurumdur ki, hər bir yaşayış məntəqəsində bölməsi var. Bu səbəbdən də yaxşı olar ki, bankomatlarla bağlı səlahiyyət "Azərpoçt"a verilsin: "Bölgələrdə bankomatların sayının artmasına ciddi ehtiyac var. İnsanlar, xüsusilə də pensiyaçılar bölgələrdə bankomat azlığının yaratdığı problemlərdən əziyyət çəkirlər. Böyük kəndlərdə və ya bu kəndləri birləşdirən 10 minlərlə əhalisi olan ərazilərdə bir çox hallarda 1 bankomat belə yoxdur. İnsanlar rayon mərkəzinə getmək üçün 10 km-lərlə yol getmək məcburiyyətində qalırlar. Bəzən isə pensiyalarını ala bilmək üçün bir neçə dəfə gedib -gəlməli olurlar ki, bu da onlar üçün problem yaradır. Çünki pensiyaçıların pensiyalarının nə vaxt kartlarında olmasından dəqiq xəbərləri olmur. Insanları çətin vəziyyətdə qoymamaq üçün bankomatların artırılması ilə bağlı tədbirlər həyata keçirilməlidir".
Günel CƏLİLOVA
