Meyxana musiqisinə meylin artması təhlükəli şəkil alıb desək, yanılmarıq. Müasir gəncliyin əksəriyyəti meyxananın təsiri altına düşüb. Xüsusən də oğru, lotu həyatını tərənnüm edən meyxanalar gənclərin beyninə daha yaxından sirayət edib.
Son zəng günü ölkəmizin bütün məktəblərində qeyd edildi. Biz son zəng tədbirlərində səsləndirilən musuqilərin bəzilərinin gənclərin psixologiyasına uyğun olmadığını düşünürük.
Bu günlərdə sosial şəbəkələrdə Gəncə məktəblərindən birində çəkildiyi iddia edilən bir video yayılıb, məzunlar meyxana sədaları altında rəqs edirlər. “Qaqa AYE, lotu dünyası qaqa” meyxanasından söhbət gedir. Məzunlar o meyxananın təsirinə elə düşüblər ki, sanki ondan ayrılmaq istəmirlər. Sosial şəbəkələrdə videoda səsləndirilən meyxana musuqisi təndiq edilib və bunu Azərbaycan təhsilinin vəziyyətinin acınacaqlı və səviyyəsinin aşağı olması ilə izah ediblər. Videoya “Ölkənin bir çox məktəblərində son zəng mərasimlərində oğru, kriminal meyxanaları səsləndirilib” kimi şərhlər yazılıb.
Əlbəttə, son zəng keçirmək məzunların haqqıdır, bu olmalıdır, amma orada küçə musiqisinin səsləndirilməsi, oğlanlı-qızlı hər kəsin kriminal ab-havada olan meyxanalara oynaması narahatlıq doğurmalıdır. Ümumiyyətlə, məzun gününə aid xüsusi mahnılar, əsərlər olmalıdır ki, onlara qulaq asılsın. Amma təəssüf ki, belə mahnılar çox azdır, bəlkə də bir-iki dənədir.
Bəlkə də məzunların, gənclərin meyxanaya meyli keyfiyyətli mahnıların olmaması ilə bağlıdır. Amma bütün hallarda məktəblərin həyətində kriminal, oğru aləmini ifadə edən mahnının səsləndirilməsi yolverilməzdir. Hesab edirik ki, əlaqədar qurumlar bu videonun hansı məktəbdə çəkildiyini araşdıracaq və tədbir görəcək.
Ekspertlərə görə isə, son zamanlar yerli telekanallardan tutmuş toylara qədər hər yerdə meyxana səsləndirilir və meyxanaçılar cəmiyyətə az qala günün qəhrəmanı kimi təqdim edilir, onların meyxanaları hər yerdə yayılır, bu səbəbdən də gənclər onların meyxanalarına aludə olur. Bunun ziyanlı olduğunu düşünən ekspertlər qeyd edirlər ki, bu kimi halların qarşısının alınması vacibdir.
“Görüntüləri çox təəssüflə izlədim”
Filologiya üzrə fəlsəfə doktoru, dosent Vüsalə Ağabəyli “Bakı-Xəbər”ə “Görüntüləri çox təəssüflə izlədim. Gələcəyin belə gənclərin əlində olması, inkişaf, maarifçilik, elm və mədəniyyəti deyil, oğru aləminin təbliğatçılarının sayının çox olması dəhşətli dərəcədə acınacaqlı haldır. Gəncə məktəbində yaşanan bu hadisə təkcə təhsil və təhsil müəssisəsinin məsələsi deyil, cəmiyyətin məsələsidir. Heç kəs deməsin ki, "şəxsi maraqlarıdır, uşaqdırlar və s." Xeyr! Xarab təməlin üstünə nə inşa edilirsə-edilsin, bir müddət sonra çökəcək.
Şəxsi maraq və zövqdən əlavə, ümumtəhsil ocaqlarında kriminal aləmi təbliğ edən mahnıların səsləndirilməsi, nümayişi yolverilməzdir. Məktəb direktorundan başqa, müavinlər, xüsusilə də tərbiyə işləri üzrə direktor müavini, müəllimlər və valideynlərin iştirak etdiyi Son zəng tədbirində öncədən hazırlanmış ssenari üzrə ədəbi-bədii kompozisiyalar təşkil olunur, uğurları vurğulayıb təbliğ edən təltiflər, fəxri fərmanlar təqdim olunur. Gəncə məktəbindəki həmin videoda isə əlində telefon hamı fərəhlə çəkiliş edir, bir müəllim, bu mahnının səsləndirilməsinə bir valideyn də etiraz etmirsə, deməli, onların da marağı və səviyyəsi həmin məktəblilərlə eyni dərəcədədir. "Gəncə və gəncəlilər" deyib bağıraraq oxuyan bu kütlə və ona şərait yaradan valideynlər, müəllimlər bu təbliğatla daha ağır sütunlarla zombi yetişdirirlər”-deyə bildirdi.
V.Ağabəylinin sözlərinə görə, Nizami Gəncəvinin, Cavad xanın vətəni olan Gəncənin adı böyük şövqlə cinayət aləminə sürükləyən mahnılarda dinlənilib, məktəblərdə səsləndirilirsə, gələcəyin qatillərinin, oğrularının, quldurlarının yetişməsinə, gəncliyin məhv olmasına, cəmiyyətin səviyyəsinin dəyərsizləşməsinə gətirib çıxarır. “Məktəblərdə keçirilən tədbirlərin planına direktor və müavinlər nəzarət etməlidir, evdə dinlənilən musiqilərə isə valideynlər. Uçuruma getməmək üçün ciddi şəkildə bu cür halların qarşısı alınmalıdır. Ümumtəhsil ocaqlarında təbliğat və maarifləndirmə işləri genişləndirilməli, yalnız şəkillər və press-relizlər üçün deyil, real şəkildə tədbirlər təşkil edilib, icrası izlənilməlidir”-deyə V.Ağabəyli bildirdi.
Leyla QARAXANLI
